iraniturk

شمعي صوندور دخي پروانه كي ياريم گلدي

گوله باخ آغلا بولوت نازلي نگاريم گلدي

گئجه بايرام ائدرم جانيمي قربان سنه يار

سروريم، تاجي سريم، باغلي باهاريم گلدي

قامتين سرو سنين، جنتي گزديم تايي يوخ

چاكري اولدوغوم اول شاهي سواريم گلدي

حسنونون شمعينه پروانه دئييب دوندي كوله

آتشيم صوندورن اول لاله عذاريم گلدي

دئديم اي نازلي ملك سئو بو نظاميني دئدي:

سنينم عهد ائله دي چشم خماريم گلدي

نيظامي گنجوي

 ايلان چيخديغي باجاني ياخشي تانييار  

 ايلان دوزلمَيينجه يوواسينا گيرمز 

 ايلان قابيغيني دَييشر، خاصيّتيني دَييشمز  

 ايلان ووران آلا چاتيدان دا قورخار  

 ايلان ووران ياتار ، آج ياتماز  

 ايلان هر يئره ده اَيري گئدسه ، از يوواسينا دوز گئدر  

 ايلان يولو اَيري گئدر، يوواسينا دوز گودر 

 ايلانا آغونو كَرتَنكله وئرر  

 ايلاني اؤزگه الي ايله توتمازلار  

 ايلاني سيد احمد الي ايله توتارلار  

 ايلاني يارالي بوراخمازلار  

 ايلانين آجيغي يارپيزدان گلر،هارا گئدسه اونونلا اوز اوزه چيخار   

 ايلانين آغينا دا لعنت ،قاراسينا دا  

 ايلانين باشيني اؤزگه الي ايله اَز  

 ايلانين بوغازينا گيرَن چيخماز  

 ايلانين قوسزوغونو يوخ ، باشيني اَزرلر  

 ايلده باشا گلمَين ، ديلده باشا گلر  

 ايلقاريندان دؤنن نامرددير  

 ايللر قوجالتماز انساني غصّه قوجالدار  

 ايلنميش اته ميلچك قونار  

 ايلنميش سويو ايچمزلر  

 ايلين آخير چرشنبه سي كيمينه دوشر، كيمينه يوخ  

 ايلين ياخشي اولاجاغي باهاريندان بللي  

 اَينينده دونو يوخ ، باشيندا پاپاق اختارير  

 ايي بيلمَين تولا دريسيني كولا وئمز  

 بار وئرن آغاجا داش آتارلار  

 بارسيز آغاجا داش آتمازلار  

 بارلي آغاجين باشينا دولانارلار  

 بارماغين هانسيني كسسن ، آغريسي بيردير  

 بازار آتا آنا تانيماز  

 بازار ايچينده ايت قولاغي كسمزلر  

 بازار باققالسيز اولماز، مئشه چاققالسيز اولماز  

 بازار چؤرَيي چوخ اولسون ، بازاردا اولسون  

 بازار شيطان يوواسيدير  

 بازار قورولدو ، حساب دورولدو  

 بازار يانسين ، آمما منه بير مانات قازانج اولسون  

 بازارا گئدر ياغيش ياغار، دَييرمانا گئدر قيرغين اولار  

 بازاردا بئز اوجوز اولاندا آدام اؤزونو اؤلدورمز   

 بازاري كاساد اولانا مَردَنه گرك اولسون  

 باش ياراندان چوخ قمه توتان وار  

 باغا چاناغيندا چيخدي ، چاناغيني بَينمدي  

 باغا يول گئده بيلمز ، ائويني بئلينده گزديرر  

 بالا قوشون آغزي بؤيوك اولار  

 بالالي قارغايا پاي دوشمز 

 باهاسينا پول وئرميشم ، گؤزلريم ده چيخسادا يئيرم  

 باهاليقدا چؤرَگيني اَسيرگَيَن اوجوزلوقدا يالقيز قالار  

 بد آت اؤزونو گؤزلر ، ياخشي آت ايگيدي  

 بد اؤزوده بير رنگدير 

 بد ائولاد خطايا اورجاح اولار  

 بد اصيلدن اصيل اولماز، بوينونمجا قيزيل قالا  

 بد اصيلدن اصيل اولماز، قاچان قيزدان خانيم!  

 بد اصيلي باشا چكرسن ، سوروشر آياغا دوشر  

 بكمز ساتانا دا لعنت، بكمز آلانادا !   

 بلد چيله گئدن يورولماز  

 بلدچييه يول گؤسترمزلر  

 بوغاز منيم ، قارين اؤزگه نين   

 بولانماسا ، دوردولماز  

 بير كسين نصيبين او بيري كس يئمز  

 بيري ياغيش اولدو ، سن تورپاق اول  

 بيريئرده اوتورما كي ، آلتينا سو چيخسين    

 پئندير يئيَن سو آختارار  

 پاپاقچينين پاپاغي ييرتيق اولار  

 پاپاقچينين كؤنلو اولسا ، بير دَريدن دوققوز پاپاق تيكر  

 پاران اوجوز ايسه ، اؤزون باهالي اول 

 پاسلي دميردن قيلينج اولماز  

 پاي بؤلَنه پاي قالماز  

 پاي پايلايان پاييندان اولار  

 پاييني يالقيز يئيَن پاييني ديشي ايله توتار 

شاه داغيم، چال پاپاغيم، ائل داياغيم، شانلي سهند´يم

باشي توفانلي سهند´يم

باشدا حئيدر بابا تك قارلا، قيروولا قاريشيبسان

سون ايپك تئللي بولودلارلا اوفوقده ساريشيبسان

ساواشاركن باريشيبسان

گؤيدن ايلهام آلالي سيرري سماواتا دييه رسه ن

هله آغ كوركو بورون، يازدا ياشيل دون دا گييه رسه ن

قورادان حالوا يييه رسه ن

دؤشلرينده سونالار سينه سي تك شوخ ممه لرده

نه سرين چئشمه لرين وار

او ياشيل تئللري، يئل هؤرمه ده آينالي سحه رده

عيشوه لي ائشمه لرين وار

قوي ياغيش ياغسا دا ياغسين

سئل اولوب آخسا دا آخسين

يانلاريندا دره لر وار

قوي قلم قاشلارين اوچسون فره لرله، هامي باخسين

باشلاريندا هئره لر وار

سيلديريملار، سره لر وار

اوستاد شهريار

او اتكلرده نه قيزلار ياناغي لاله لرين وار

قوزولار اوتلاياراق نئيده نه خوش ناله لرين وار

آي كيمي هاله لرين وار

گول- چيچكدن بزه نه نده، نه گلينلر كيمي نازين

يئل اسه نده او سولاردا نه درين راز-و نيازين

اوينايار گوللو قوتازين

تيتره يير ساز تئلي تك شاخه لرين چايدا چمنده

يئل او تئللرده گزه نده، نه كوراوغلو چالي سازين

اؤرده يين خلوت ائديب گؤلده پريلرله چيمه نده

قول-قاناددان اونا آغ هووله آچار غمزه لي قازين

قيش گئده ر، قوي گله يازين

هله نووروز گولو وار، قار چيچه يين وار، گله جكلر

اوزلرين تئز سيله جكلر

قيشدا كهليك هوسيله، چؤله قاچديقدا جاوانلار

قاردا قاققيلداياراق نازلي قلمقاشلارين اولسون

ياز، او دؤشلرده ناهار منده سين آچديقدا چوبانلار

بوللو سودلو سورولر، دادلي قاووتماشلارين اولسون

آد آلير سندن او شاعير كي سن اوندان آد آلارسان

اونا هر داد وئره سه ن، يوز او موقابيل داد آلارسان

تاريدان هر زاد آلارسان

آداق اولدوقدا، سن اونلا داها آرتيق اوجالارسان

باش اوجالديقدا دماوند داغيندان باج آلارسان

شئر اليندن تاج آلارسان

او دا شئعرين، ادبين شاه داغيدير، شانلي سهند´يم

او دا سن تك آتار اولدوزلارا شئعريله كمندي

او دا سيمورغدان آلماقدادي فندي

شئعر يازاندا قلميندن باخاسان دورر سپه له ندي

سانكي اولدوزلار اله ندي

سؤز دييه نده گؤره سه ن قاتدي گولو، پوسته ني،

قندي

ياشاسين شاعير افندي

او نه شاعير، كي داغين وصفينه ميصداق اونو گؤردوم

من سنين تك اوجاليق مشقينه مششاق اونو گؤردوم

عئشقه، عئشق اهلينه موشتاق اونو گؤردوم

او نه شاعير، كي خيال مركبينه شووشيغاياندا

او نهنگ آت، آياغين توزلو بولودلاردا قوياندا

لوله له نمكده دي يئر-گؤي، نئجه تومار ساريياندا

گؤره جكسه ن او زاماندا

نه زامان وارسا، مكان وارسا كسيب بيچدي بير آندا

گئچه جكلر، گله جكلر نه بوياندا، نه او ياندا

نه بليلم قالدي هاياندا؟

باخ نه حٶرمت وار اونون اؤز دئميشي توك پاپاغيندا

شهرييار´ين تاجي اه ييلميش باشي دورموش قاباغيندا

باشينا ساوريلان اينجي، چاريق اولموش آياغيندا

وحيدير شئعري، ملكلردي پيچيلدار قولاغيندا

آيه لردير دوداغيندا

شهدي وار بال دوداغيندا

او دا داغلار كيمي شانينده نه يازسام ياراشاندير

او دا ظاليم قوپاران قارلا، كولكله دوروشاندير

قودوزا، ظاليمه قارشي سينه گرميش، ووروشاندير

قودوزون كوركونه، ظاليم بيره لر تك داراشاندير

آمما واختيندا فقير خالقي اه ييلميش سوروشاندير

قارا ميللتده هونر بولسا، هونرله آراشاندير

قارالارلا قاريشاندير

ساريشاندير

گئجه حاققين گؤزودور، طور تؤره تميش اوجاغيندا

اريييب باغ تك اوره كلردي يانارلار چيراغيندا

مئي، محببتدن ايچيب لاله بيتيبدير ياناغيندا

او بير اوغلان كي، پريلر سو ايچه رلر چاناغيندا

اينجي قاينار بولاغيندا

طبعي بير سئوگيلي بولبول كي، اوخور گول بوداغيندا

ساري سونبول قوجاغيندا

سولار افسانه دي سؤيله ر اونون افسونلو باغيندا

سحه رين چنلي چاغيندا

شاعيرين ذٶوقو، نه افسونلو، نه افسانه لي باغلار

آي نه باغلار كي “اليف لئيلي” ده افسانه ده باغلار

اود ياخيب، داغلاري داغلار

گول گوله رسه بولاق آغلار

شاعيرين عالمي اؤلمه ز، اونا عالمده زاوال يوخ

آرزولار اوردا نه، نه خاطيرله يه ايمكاندي، ماحال يوخ

باغ-ي جننت كيمي اوردا “او حارامدير، بو حالال” يوخ

او محببتده ملال يوخ

اوردا حالدير، داها قال يوخ

گئجه لر اوردا گوموشدندي، قيزيلدان نه گونوزلر

نه زوموررود كيمي داغلاردي، نه مرمر كيمي دوزلر

نه ساري تئللي اينه كلر، نه آلا گؤزلو اؤكوزلر

آي نئجه آي كيمي اوزلر

گول آغاجلاري نه طاووس كيمي چترين آچيب الوان

حولله كروانيدي، چؤللر، بزه نه ر سورسه بو كروان

دوه كرواني دا داغلار، يوكو اطلسدي بو حئيوان

صابير´ين شهرينه دوغرو، قاتاري چكمه ده سروان

او خياليمداكي شيروان

اوردا قار دا ياغار، آمما داها گوللر سولابيلمه ز

بو طبيعت، او طراوتده ماحالدير، اولابيلمه ز

عؤمر پئيمانه سي اوردا دولابيلمه ز

او اوفوقلرده باخارسان نه دنيزلر، نه بوغازلار

نه پري لر كيمي قولار، قونوب-اوچماقدا نه قازلار

گؤلده چيممه كده نه قيزلار

باليق اولدوز كيمي گؤللرده، دنيزلرده پاريلدار

آبشار مورواريسين سئل كيمي تؤكدوكده خاريلدار

يئل كوشولدار، سو شاريلدار

قصريلر واردي قيزيلدان، قالالار واردي عقيقدن

رافائل تابلوسو تك، صحنه لري عهد-ي عتيقدن

دويماسان كؤهنه رفيقدن

جننتين باغلاري تك باغلارينين حورو قوصورو

الده حوريلرينين جام-ي بولورو

تونگونون گول كيمي صهبا-يي طهورو

نه ماراقلار كي، آييق گؤزلره رؤيادي دئييرسه ن

نه شافاقلار كي، ديرن باخمادا دريادي دئييرسه ن

اويدوران جننت-ي مأوادي دئييرسه ن

زٶهره نين قصري بيريليان، حيصار نرده سي ياقوت

قصر-ي جادودو، موهنديسلري هاروت ايله ماروت

اوردا ماني دايانيب قالميش او صورتلره مبهوت

قاپي قوللوقچوسو هاروت

اوردا شئعرين، موزيكين منبعي سرچئشمه دي قاينار

نه پريلر كيمي فه وواره دن افشان اولوب اوينار

شاعير آنجاق اونو آنلار

دولو مهتاب كيمي ايستخريدي فه وواره لر ايله

ملكه اوردا چيمير، آي كيمي مهپاره لر ايله

گوللو گوشواره لر ايله

شئعر-و موسيقي شاباش اولمادا، افشاندي پريشان

سانكي آغ شاهيدير اولماقدا گلين باشينا افشان

نه گلينلر كي، نه انليك اوزه سورته رلر، نه كيرشان

ياخا نه تولكو نه دووشان

آغ پريلر، ساري كؤينه كلي بولودلاردان ائنيرلر

سود گؤلونده ملكه ايله چيمه ركن سئوينيرلر

سئوينيرلر، اؤيونورلر

قووزاناندا هله الده دولو بير جام آپاريرلار

سانكي چنگيلره، شاعيرلره ايلهام آپاريرلار

دريا قيزلارينا پئيغام آپاريرلار

دنيزين اؤرتويو ماوي، اوفوقون سقفي سماوي

آينادير هر نه باخيرسان: يئر اولوب گؤيله موساوي

غرق اونون شئعرينه راوي

غورفه لر، آي، بولود آلتيندا اولار تك گؤرونورلر

گؤز آچيب-يومما، چيراقلار كيمي يانديقدا سؤنورلر

صحنه لر چرخ-ي فلك تك بورونوب، گاه دا چؤنورلر

كؤلگه ليكلر سورونورلر

زوهره ائيواندا ايلاهه شينئلينده گؤرونه ركن

باخسان حافيظ´ي ده اوردا صلابتله گؤره رسه ن

نه سئوه رسه ن

گاه گؤره ن حافظ-ي شيراز ايله بالكاندا دوروبلار

گاه گؤره ن اورتادا شطرنج قوراركن اوتوروبلار

گاه گؤره ن سازيله، آوازيله ائيله نجه قوروبلار

سانكي ساغر ده ووروبلار

خاجه الحان اوخوياندا، هامي ايشدن دايانيرلار

او نوالرله پريلر گاه اويوب گاه اويانيرلار

لاله لر شٶعله سي، الوان شيشه رنگي بويانيرلار

نه خومار گؤزلو يانيرلار

قاناد ايسته ر بو اوفوق، قوي قالا ترلانلي سهند´يم

ائشيت اؤز قيصصه مي، دستانيمي، دستانلي

سهند´يم

سني حئيدر بابا او نعره لر ايله چاغيراندا

او سفيل داردا قالان تولكو قووان شئر باغيراندا

شئيطانين شيللاغا قالخان قاتيري نوخدا قيراندا

بابا قورقور (؟) سسين آلديم، دئديم آرخامدي، اينانديم

آرخا دوردوقدا سهند´يم ساوالان تك هاوالانديم

سئله قارشي قووالانديم

جوشقون´ون دا قاني داشدي، منه بير هايلي سس

اولدو

هر سسيز بير نفس اولدو

باكي داغلاري دا، هاي وئردي سسه، قيها اوجالدي

او تايين نعره سي سانكي بو تايدان دا باج آلدي

قورد آجالديقدا قوجالدي

راحيم´ين نعره سي قووزاندي، دييه ن توپلار آتيلدي

سئل گليب نهره قاتيلدي

روستم´ين توپلاري سسله ندي، دييه ن بوملار آچيلدي

بيزه گول-غونچا ساچيلدي

قورخما گلديم دييه، سسلرده منه جان دئدي قارداش

منه جان-جان دييه ره ك، دوشمنه قان-قان دئدي

قارداش

شهرييار سؤيله مه دن گاه منه سولطان دئدي قارداش

من ده جانيم چيغيريب: جان سنه قوربان دئدي قارداش

ياشا اوغلان سيزه داغ-داش دلي جئيران دئدي قارداش

ائل، سيزه قافلان دئدي قارداش

داغ، سيزه آسلان دئدي قارداش

داغلي حئيدربابا´نين آرخاسي هر يئرده داغ اولدو

داغا داغلار داياق اولدو

آراز´يم آينا-چيراق قويمادا،آيدين شافاق اولدو

او تايين نغمه سي قووزاندي، اوره كلر قولاق اولدو

يئنه قارداش دييه ره ك قاچمادا باشلار آياق اولدو

قاچديق، اوزله شديك آرازدا، يئنه گؤزلر بولاق اولدو

يئنه غملر قالاق اولدو

يئنه قارداش ساياغي سؤزلريميز بير ساياق اولدو

وصل اييين آلمادا، ال چاتمادي عئشقيم داماق اولدو

هله ليك غم سارالاركن قارالار دؤندو آغ اولدو

آراز´ين سو گؤلو داشدي، قاياليقلار دا باغ اولدو

ساري سونبوللره زولف ايچره اوراقلار داراق اولدو

يونجاليقلار يئنه بيلديرچينه ياي-ياز ياتاق اولدو

گؤزده ياشلار چيراق اولدو

لاله بيتدي ياناق اولدو

غونچا گولدو، دوداق اولدو

نه سول اولدو، نه ساغ اولدو

ائليمي آرخامي گؤردوكده ظاليم اووچو قيسيلدي

سئل كيمي ظولمو باسيلدي، زينه آرخ اولدو، كسيلدي

گول گؤزوندن ياشي سيلدي

تور قوران اووچو آتين قوومادا سيندي، گئري قالدي

اؤزو گئتدي، تورو قالدي

آمما حئيدربابا دا بيلدي كي، بيز تك هامي داغلار

باغلانيب قول-قولا زنجيرده، بولودلار اودور آغلار

نه بيليم بلكه طبيعت اؤزو نامرده گون آغلار

ايري يوللاري آچاركن، دوز اولان قوللاري باغلار

صاف اولان سينه ني داغلار

داغلارين هر نه قوچو، ترلاني، جئيراني، مارالي

هامي دوشگون، هامي پوزغون، سينه لر داغلي،

يارالي

گول آچان يئرده سارالي

آمما ظن ائتمه كي، داغلار يئنه قالخان اولاجاقدير

محشر اولماقدادي بونلار داها وولقان اولاجاقدير

ظولم دونياسي ياناركن ده تيليت قان اولاجاقدير

واي …! نه توفان اولاجاقدير

درديميز سانما كي، بير تبريز-و تئهران´دير عزيزيم

يا كي، بيز تورك´ه جهننم اولان ايران´دير عزيزيم

يوخ بو دين داعواسيدير، دونيا تيليت قاندير عزيزيم

تورك اولا، فارس اولا دوزلوك داها تالاندير عزيزيم

بيز آتان ديندير، آتان دا بيزي ايماندير عزيزيم

ساميري مروتد ائديب هه نه (؟) موسلماندير عزيزيم

اوممه تين هارون´و من تك، له له گيرياندي عزيزم

هر طرفدن قيليج ائنديرسه لر (؟) قالخاندير عزيزيم

بير بيزيم درمانيميز موسي-يي عيمران´دير عزيزيم

گله جك شوبهه سي يوخ، آيه-يي قورآندير عزيزيم

او هامي دردلره درماندير عزيزيم

دوقتور اولدوقدا بشر بو ياراني ساغلاماق اولماز

اولماسا آللاه الي دين مرضين چاغلاماق اولماز

داغلاماق دا علاج اولسا بير ائلي داغلاماق اولماز

ديني آتميش ائله ياوروم داها بئل باغلاماق اولماز

او گولوب آغلايا دا، اونلا گولوب آغلاماق اولماز

شئيطاني ياغلاماق اولماز

دئدين: آذر ائلينين بير يارالي نيسگيلييه م من

نيسگيل اولسام دا گولوم بير ابدي سئوگيلييه م من

ائل مني آتسا دا اؤز گوللريمين بولبولويه م من

ائليمين فارسيجا دا درديني سؤيله ر ديلييه م من

دينه دوغرو نه قارانليق ايسه ائل مشعلييه م من

ادبييات گولويه م من

نيسگيل اول چرچييه قالسين كي جواهير نه دي قانمير

مدنييت دبين ائيلير بدوييت، بير اوتانمير

گون گئدير آز قالا باتسين گئجه سيندن بير اويانمير

بير اؤز احوالينا يانمير

آتار اينسانليغي آمما يالان انسابي آتانماز

فيتنه قووزانماسا بير گون گئجه آسوده ياتانماز

باشي باشلارا قاتانماز

آمما مندن ساري، سن آرخايين اول شانلي سهند´يم

دلي جئيرانلي سهند´يم

من داها عرش-ي اعلا كؤلگه سي تك باشدا تاجيم وار

الده فيرعون´ا قنيم بير آغاجيم وار

حرجيم يوخ، فرجيم وار

من علي اوغلويام، آزاده لرين مرد-و مورادي

او قارانليقلارا مشعل

او ايشيقليقلارا هادي

حاققا، ايمانا مونادي

باشدا سينماز سيپريم، الده كوته لمه ز قيليجيم وار

اوچور ايلهاميم او قوشلار كيمي كي

ياز وعده سينده

قووزانير ماوي گؤيه تا اوجا باش بير داغا قونسون

كؤرپه قارتال كيمي دير

گاه چكيلير گرزده ن ايتينجه ك

اگله نير گاه ساوالان عشقينه – آغدان – آغاقونسون

هر اوجا داغ كي گؤرورسن باشي قاردلا آغاراندي

اورا بيل كي ساوالاندي

آمما يوخ !

هر اوجا داغ سسيمي السا دا تئز قئيته ره جكدي

سسي قئيته رمك همان يئل بيله جكدي

آخي يئل يولچودو گئتگين اوكي سؤز ساخلايا بيلمز

يئل سؤزو قاپدي قاچيردار اونو كيم هاخلايابيلمز

يئل گئدرگيندي پيچيللارسؤزوكوللار قولاغيندا

سؤزو قربان ائله ير قيرنادا قانقال آياغيندا

اوستاد هوشنگ جعفري

چئويره ر سؤز چاناغيندا

جالايارداغلارا هر بير سؤزو مين سؤز تؤره دندي

بيلميرم سيرري ندندي

يئل گئده ر گيندي يئلي ساخلاماق اولماز

يئله بئل باغلاماق اولماز

آمما سن اي سؤزو سينه نده كؤزردن ساوالانيم

كيم گله صدقله زرتشت بئجردن ساوالانيم

ائليمين شانلي داغي باشيوه مين لرجه دولانيم

اريديب ائل غمي بير يول سني كؤكدن ده تالانسان

سئل اولوب قانلي دنيز لر كيمي دونيايه جالانسان

آدي ديللرده قالاناسان

ساوالانسان ، ساوالانسان

ساوالان ائل غميني بللي دي ساخلار سينه سينده

سينه سي كؤزدو آلودور گيزيريك اينسي سي واردير نفسينده

شاعرين غملي سه سينده آلگيلان ساخلاسن اي ائل داغي غملي قفسينده

ساوالان آلسادا هر سيرري سؤزو داغلارا سالماز

گؤره نامرد دوروبدور ساوالاندان سس اوجالماز

ساوالاندا تؤكولن داشلاري ديندير دانيشاللار

سالسا عاشيق نفسين كوللارا آليشاللار

ده ده قود سازي چالسا

ده لي دومرول باش اوجالدار

بلي البته كي يولداس باشيني يولداش اوجالدار

سسله عاشيق سازي چالسين

سسي ميز بيرده اوجالسين

اويناماقليز گي يه دؤنسون

كاس شوشمگوزگويه دؤنسون

قوي وئره ك سس سسه باهم اوخوياق بير ده كوراوغلو دلي سيندن

هجرين قوچ نبي سيندن

اوكي ظاليملري مظلولارين اوستونده ازه ردي

او كي آسلان كيمي داغلاردا ياتيب باغدا گزه ردي

اوخو عاشق اوخو

سن بيل او كي تانري تانييبسان

سؤزومه دوز جالييبسان

سوموگوم قوي سازا گلسين

بولبولوم آوازا گلسين

يازميشام ايوازا گلسين

گوچ آلاق قوي دلي لردن

باج آلاق اجنبي لردن

او كي بيلمير نبي كيمدير قويون آذرائليني مسخره سانسين

بير عؤمور دوركي فضولي ني –  نسيمي ني دانيب ايندي ده دانسين

شهريار تك سن اوجالت باشيوي قوي عرشه دايانسين

قوي باخار كور تر ايچينده جوموبان اؤلسون – اوتانسين

اوكي آخساخدي يوبانسين

اوكي توركون ديلين اسگيتمه گه تصويره ساليبدير

اوكي توركون بالاسين ايندي ده آشغالچي سانيبدير

او تفاله بيليرم فيكيريني طاغوتدان  آ ليبدير

او رژيمدندي قاليبدير

يوخسا توركون بالاسيندا نچيخيب علامه ي دوران

اونا دونيا باش ا يير فلسفه ده

بير جه نه ايران

قوي دئييم شهرياريمدان

نيسگيل او چرچي يه قالسين كي جواهر نه دي ، قانمير

فيكري آللاتما دادير خالقي ،ائلين حالينه يانمير

اريمير ، اؤلمور ، اوتانمير

آخي اي قاردا ، دوماندا باش اوجالدان ساوالانيم

غمي ، دونيا ني قوجالدان ساوالانيم

ائل بيلير داغلار آرا هراوجا داغلار باشي سن سن

وئرسهنده اليوي قارداشيوين سير داشي سن سن

وئر گيلن بير ليك الين بيرده دماونده اونون يولداشي سن سن

اوندان آيريلما آماندي

يولوموز چندي دوماندي

قوي ايگيدلر سيزه فخر ائيله ييبن باشان اوجالتسين

قويما قارتال دولانان يئر لره قوز غون الي چاتسين

ساوالان چنلي چاغيندا

منيم ايلهاميم اولاركن

كؤنلوم اؤز سرري سؤزون صدق ايله سؤيلر ساوالانه

ساوالان كؤز قالادار شاعر اولانلار سينه سينده

اوردا زرتشت گئيب تانريدان ايلهامين آلانه اگيرم باش ساوالانه ، اگيرم باش

ساوالانه