آغ آتيم
یازار : amir
+0 به يه ن
آت قدمين يورتما يئري
آش تپه لردن
سيلديريم تك سره لر دن
سئله سينميش دره لردن
بو نه طوفاندي گوزل گهليگيمي ايستير آييرسين فره لردن
غيرتيم جوشه گلير غملي خبر دن
آغ آتيم قورخما خطر دن!
اوستاد هوشنگ جعفري
آغ آتيم ، قول قاناتيم
شيهه چك، قوي سسيوه
بلكه ياتالار دا اويانسين
ياتماغين واختي دگيل دورسون اوتانسين
ياتانين عومرو تالانسين
تازا نعلين وار آتيم
چال بو داغين سينه سينه ، قوي پارالانسين
چال داغين سينه سي باتسين ، يارالانسين
داشي داشدان ، آرالانسين.
آغ آتيم ، قول قاناتيم
داش قايادان آشما چتيندي
قاباق اوز يوققوشادي ،قاشما چتيندي
داغا ديرماشما چتيندي
داشا، سوخاشم چتيندي
باخما يولاري چتين ،هيبتي چوخدور
آغ آتيم آت قدمين !
غيرتي يوخدور
هله اوز يوققوشلارا چوخدو قاباقدا
آشماق اولماز بو آياقدا
آغ آتيم ، قول قاناتيم
بسدي اياق ساخلاما ،گون باتدي قارالدي
گون گچيب داغ دالينا رنگي سارالدي
داغين اوستون دومان آلدي
آغ آتيم بس بو نه حالدي؟
بورا يارقاندي آتيم دوما آماندي ....
دورماغين قيمتي جاندي
آغ آتيم ، قول قاناتيم
آت قدمين آيدينليغا ساري
هوركوشن اوولاريلان ؛ چيخ سره ياللاري يوخاري
قار قالان داغلارا سال بير نفسين
قوي اريسين بوز كيمي چئگنينده كي قاري
قوريان گوللره سالدير بو سولاري
سال بو ارخ ايچره سووارسين قورو قالميش مومالاري
قوي بويوك گولده اوزوشسونله ياشيل باش سونالاري
آغ آتيم جهد ائله باري
سني تاري!
آغ آتيم ، قول قاناتيم
طبعيمين درياسي جوشقوندو
يئل اسدير لپه لنسين
قوي چاليم صخره لره دالغامي، داغام سپه لنسين
قوي ياغيش تك قوريان
داغلارين اوستونده اله نسين
هرزه اوتلاري آپارسين
لالا بيتسن
هامي گوللر تزه لنسين
گولو بولبول يييه لنسين
آغ آتيم ، قول قاناتيم
شيهه چك قوي سسيوه
هاجريني تركينه چكسين نبي گلسين
قوي كوراغلو قير آتين داغلارا سالسين
ائشيديب شيهه ني گلسين
الده كسگين قيليجيلا
بوياسين قانه كئچل حمزه ني گلسين
قوي كرم سازيني سالسسين دوشنه چوللره دوشسون
هاي سسي اوللره دوشسون
دئگيلن غملي كرم ايستير اگر ، اصليني گليسين
آغ آتيم ، قول قاناتيم
بيز اگر قلعه ي سيمرغ دان آشساق بيزه آزدي
باخما يولار ناتارازدي
باخما بو قارلي دماوند ،بو قفقاز بو هرازدي
باخما داغدا هاوا دوتقوندو ـ آيازدي
باخما بو قيشدي بو يازدي
آغ آتيم آت قدمين دريا ،دايازدي
درياني گيچسن اگر شهرِ نيازدي
اوردا هر قان كي توكولدو يئره ، آزادليغي يازدي
بشر ازادليغا بازدي!
آغ آتيم ، قول قاناتيم
اوردا دولبرچين اوتو دورت پر آچيبدي
اوردا ديللنمگه ديل تازه شيرين ديللر آچيبدي
اوردا باغلاردا بوتون گوللر آچيبدي
آغ آتيم
آت قدم
آيدينليغا ساري!
آغ آتيم
آت قدم
آيدينليغا ساري!
بنفشه!
یازار : amir
+0 به يه ن
يارين نوباريسان بيزيم دياردا
قيوريم تئللريني سانا، بنفشه!
من سني سئوميشم بير ايلك بهاردا
كونلومي وئرميشم سانا، بنفشه!
سنسن ازل گوندن منيم سرداشيم
گوزوندن آيريلسين آخار گوز ياشيم
گووده مين اوستونده دورمايير باشيم
بوراندا بوينوني يانا، بنفشه!
چيخميشام سيرينه مي لي، مزه لي
حيراندر حسننه ائللر گوزه لي
كونلوم اويلاغيني ياخين گزه لي
چوخلاري كوسندي مانا، بنفشه!
اوزونده گورديگيم نه انتظار دير؟
قلبينده واقفين سري مي واردير؟
گل اوندان سوز آچما، ايندي بهاردير
باغريمي دوندرمه قانا، بنفشه!
بوينوني كج بورما گل ايننن بئله
من سنه سوز قوشوم، سن مني دينله
وورغونون شعريله، سنين حسننله
طبيعت گله جك جانا، بنفشه!
لزگي قيزي
یازار : amir
+0 به يه ن
اتگيني چيرميه رك
سامور چايدان كچنده سن
خفيف- خفيف اسه ن كولك
ئوپدي سنين گل اوزوندن
كونول دئدي: دايان بير آز
او دلبيرين سيرينه دال
دئديم تورا ياخين دورماز
اوچي گورموش اوركك مارال
آچدي خيال يلكنيني
سامور چايين باش بندينه
اورك دئدي: باغلار مني
او گوزلرين كمندينه
گليب چخدين سن ساحله
آياغيني ئوپدي چمن
نه من گلديم، نه سن ديله
بودا كچدي عمريميزدن
سن عمرينين گنج ياشيندا
آدديميني سايا- سايا
گليب كچدين داغ باشيندا
توستولنن بير كومايا
اورك قالدي يانا- يانا
ايلك گوروشدن آيريلديق بيز
سن او يانا، من بويانا
قالدي آياق ايزلريميز
صمد وورغون
ديوانه دور
یازار : amir
+0 به يه ن
شيرين حديثين هر سؤزي مين گوهر يكدانه دور
انوارينا شمع روخون آييله گون پروانه دور
اوزون دور اول تابان قمر ، كانوار تابيندان اونون
خورشيد و ماهين مشعلي دايم توتوشموش يانه دور
دؤرونده عينين ساغري صاحب طريقت سالكين
پير مغان اولدي آدي سر حلقه ميخانه دور
تسبيح ايله سجاده ني الدن بوراخ اي متقي
شول زولف و خالين باخ اون گؤركي نه دام و دانه دور
عاشقلرين جانانه سي حقدور ، حقه وئر جانيني
نچونكي جانسيز قاليسيز اول جان كي بي جانانه دور
عشقين حديثين گل ائشيت افسانيه وار اويما كيم
قرآني ساتان واعظين نقلي اوزون افسانه دور
دوشمز خمارين رنجينه وحدت ميندن تا ابد
چون مست حق كي ساقي سي شول نرگس مستانه دور
شول صورت رحمانه اول ساجد كي مردود اولمادي
اول اهل حق كي سجده سي شول صورت رحمانه دور
عارف گؤرندي ربني گل ربني گؤر عارف اول
محبوب اولان حقدن بوگون شيطانيلن بيگانه دور
مشگين ساچين زنجيرينه ، دوشدي نسيمي اي صنم
زنجير زولفون قصدينه صيد اولمويان ديوانه دور
منه
یازار : amir
+0 به يه ن
دردي درد اولموش ائلينده منه
آغلاديم بير ناشي گولنده منه
هئچ كيم آغلاماسين اؤلنده منه
من هئچ واخت ، هئچ زامان اؤلمه رم داها
آزاد قارداشيم وار ، اونونلا خوشام
من گرك ساحيلي ساحيله قوشام
ايكي بؤلونمكدن ائله قورخموشــام
چؤپوده ايكي يه بؤلمه رم داها
دنيزلر دريالار منه دايازدير
ان درين بير چاي وار او دا آراز دير
منه گؤروش وئرين ، آزادليق آزدير
گؤروشسم آيريلماق بيلمه رم داها
منيم سعادتيم هارداسا ايتدي
او آسان گلميشدي ، آسان دا گئـتدي
منه نه ائتديسه سعادت ائتدي
بد بخت سعادته گولمه رم داها
نصرت كسمنلي