ائوده بير ايل آه چكرم خبر يوخ
یازار : amir
+0 به يه ن
ائوده بير ايل آه چكرم خبر يوخ
ائودن چيخام من او يانا يار گلير
تاي توشلاريم چوله چيخا گون چيخار
من چيخاندا ياغيش گئدن قار گلير
يازيق گوزوم آجليغا دوز داريخما
بوگون سحر باهار گلي بار گلير
بيزه گله گلميه بير كال ايده
قونشوموزا هيوا گلي نار گلير
خان ائوينه شير گلي قويروق بيلار
بيزم ائوه كور ايت گلي هار گلير
خلقه قوناق گلي گوزو سورمه لي
بيزيم ائودن كور گيتمه ميش كار گلير
بختيمه آرواد نه چيخا بيلميرم
بلليدير كي ساغ ساغا سوسار گلير
بير اوج اتك اندازادي اگنيمه
ساليس بوري گن گلمه سه دار گلير
دولتيه ياس دا گله اوينايار
بيز كاسيبا طوي گله آخسار گلير
غم يوكونن كد خدا نين هيس سسي
خردل اولي بيزيم كي خالوار گلير
كده بيزي دويلله بير هاوار يوخ
بيز بير كلمه حق دانيشاق جار گلير
دارقا شاييد لار بيزه سركار چيخار
دار ديبينن قورتولا سردار گلير
بوندان بئله اؤزگه گورم اؤزكه دن
ميننت چكير غيرتمه عار گلير
ايشجي تويق كسنده من باخاممام
بيلمم نجه اؤرگينن وار گلير
غم دن منيم بير عينك وار گوزومده
ايشيق آيدين گون گوزومه تار گلير
عشقيم دوشوب ياديما گوزلر داشير
باهاردا سئل آدلانا چايلار گلير
چوخ شاعيرين طبعي دونار بوز كيمي
اوستاد شهريار
آتابابا سوزلري۱۰
یازار : amir
+0 به يه ن
ايت ياتار قارا آغاج كؤلگه سينده دئير بس اؤز كؤلگه سيدير
ايت ياتار قايا كؤلگه سينده ، دئير بس اؤز كؤلگه سيدير
ايت ييه سيني تانيمير
ايت ييه سيني تانييار
ايتي چؤرك تنديردن ، منّتي يوخ پنديردن
ايتي ييه سينه تانيتديرير
ايتيب، آختاراني يوخدور
ايرمي گليري اولوب، ايرمي بيرخرجي اولانين واي حالينا
ايرميسينده يئل چكن ، آلتميشيندا سيزلار
ايستَدي قايشن دوزلده ووردو ، گؤزون چيخارتدي
ايستي سئون توستوسونه دؤزر
ايستَييرسن قوجاليقدا حرمتين اولسون ، جوانليقدا قوجالار حرمت ائيله
ايشي باشلاماميش آخيريني دوشون
ايگيد اؤلر آدي قالار، مخنّثين نه يي قالار؟
ايگيد اؤلر اونو شهرت قالار ، اؤكوز اؤلر گونو قالار
ايگيد اودور، آتدان دوشوب آتلانا ، ايگيد اودور، خر عذابا قاتلانا
ايگيد اودوركي، آپارديغيني گتيرسين
ايگيد اوغول جوان ائيلر آتاني
ايگيد اوغول دوشمنه اَييلمز
ايگيد ايلقاريندان دؤنمز، دوه اووساريندان
ايگيد باسديغين كسمز
ايگيد جانلي ، كباب قانلي
ايگيد قووغاسيز اولماز
ايگيد لقبله تانينار
ايگيد ليگين ده يئري وار
ايگيد مئيداندا معلوم اولار
ايگيد يارسيز اؤلمز
ايگيد يوز ياشار، فرصت بير دوشر
ايگيده هونرينه گؤره آد وئررلر
ايگيدي ياخشي ساخلار، ياخشي آرواد ، ياخشي آت
ايگيديم ايگيد اولسون ، كول ديبي ائويم اولسون
ايگيدين الي ايشده گرك
ايگيدين ايگيددن احتياطي آرتيقدير
ايگيدين باشي قالدا گرك !
ايگيدين خنجري قينيندا قالماز
ايگيدين منزيلي بير اولار ، نامردين منزيلي اولماز
ايل باهاريندان بيلينر
ايل وار بير گونه دَير، گون وار بير ايله دَير
ايل وار بير گونه دَيمز، گون وار بير ايله دَير
ايلان آدامين توپوغونوگؤزلر، آدام ايلانين باشيني
ايلان آغزيندان قورتاردي ، قورباغا آغزينا دوشدو
ايلان آغزيندان قورتولوب ، اَژدها آغزينا دوشدو
ايلان آياغي ، قاريشقا گؤزو، موللا چؤرَگي، كيم گؤروب؟
شعله ي شمعه اؤزون رسمدي پروانه ويرار
یازار : amir
+0 به يه ن
او سر زولفووه مشّاطه، پري شانه ويرار
چوخ ستمگردي پريشاني پريشانه ويرار
گؤرورم قتليمه آماده دي جلاد گؤزون
تُرك بد مست تك، ال خنجر برّانه ويرار
حلقه زولف گره گيري ده باغلاندي كؤنول
اؤز اؤزون گؤر نئجه زنجيره بو ديوانه ويرار
لوح رخساريوي دوتموش او خطا كار خطون
قويما بيگانه الين سيب زنخدانه ويرار
آلميسان يانوه گؤردوم گئجه رؤيادا مني
اؤزوم اؤز بختيمي بوللم، بو يوخي يانه ويرار!
لبلرون فكري منه قوت دل اولسا نه عجب
طعنه ياقوت لبون لعل بدخشانه ويرار
شيخ صنعان كيمي هركيمسه سني گؤردي دئدي:
عاقبت رخنه بو ترسا بچه ايمانه ويرار
ناوك غمزون ايچر قانيمي اي قاشي كمان
چشم مستون كيمي مخموردو، پيمانه ويرار
يانارام آتش هجرانووه باك ائيلمرم
شعله ي شمعه اؤزون رسمدي پروانه ويرار
زاهدون كفرينه عشقيم وئري فتواي صريح
كافر عشقه باخون، طعنه مسلمانه ويرار!
وار اميديم سالا صراف اله بير سرمايه
صراف تبريزي
خان ننه
یازار : amir
+0 به يه ن
خان ننه، هاياندا قالدين
بئله باشيوا دولانيم
نئجه من سني ايتيرديم!
دا سنين تايين تاپيلماز
سن أولن گون، عمه گلدي
مني گتدي آيري كنده
من اوشاق، نه آنليايديم؟
باشيمي قاتيب اوشاقلار
نئچه گون من اوردا قالديم
قاييديب گلنده،باخديم
يئريوي ييغيشديريبلار
نه أوزون، و نه ده يئرين وار
.
.
.
«هاني خان ننه م؟» سوروشدوم
دئديلركه:خان ننه ني
آپاريبلا كربلايه
كه شفاسين اوردان آلسين
سفري اوزون سفردير
بير ايكي ايل چكرگلينجه
نئجه آغلارام، يانيخلي
نئچه گون ائله چيغيرديم
كه سسيم، سينم توتولدي
او، من اولماسام يانيندا
أوزي هئچ يئره گدنمز
بو سفر نولوبدي، من سيز
أوزي، تك قويوب گئديبدي؟
هاميدان آجيخ ائدركن
هامييا آجيخلي باخديم
سونرا باشلاديم كه: من ده
گئديرم اونون دالينجا
دئديلر: سنين كي تئزدير
امامين مزاري اوسته-
اوشاقي آپارماق اولماز
سن اوخي، قرآني تئز چيخ
سن اوني چيخينجا بلكه
گله خان ننه سفردن
تله سيك راوانلاماقدا
اوخويوب قرآني چيخديم
كه يازيم سنه: گل ايندي
داها چيخميشام قرآني
منه سوقت آل گلنده
آما هر كاغاز يازاندا
آقامين گؤزي دولاردي
سنده كي گليب چيخمادين
نئچه ايل بو انتظارلا
گوني، هفته ني سايارديم
تا ياواش ياواش گؤز آچديم
آنلاديم كه، سن أولوبسن!
بيله بيلميه هنوزدا
اوره گيمده بير ايتيك وار
گؤزوم آختارار هميشه
نه ياماندي بو ايتيك لر
خان ننه جانيم، نولِيدي
سني بيرده من تاپايديم
او آياقلار اوسته، بيرده
دؤشه نيب بير آغلايايديم
قولي حلقه سالميش ايپ تك
او آياغي باغليايديم
كه داها گئدنميه ايدين
گئجه لر ياتاندا، سن ده
مني قوينووا آلاردين
نئجه باغريوا باساردين
قولون اوسته گاه سالاردين
آخي دنيا ني آتاركن
ايكيميز شيرين ياتارديق
يوخودا(لولئي)آتاركن
سني من بلشديرَرديم
گئجه لي، سو قيزديراردين
أوزيوي تميزليهردين
گنه ده مني أوپردين
هئچ منه آجيخلامازدين
ساواشان منه كيم اولسون
سن منه هاوار دوراردين
مني، سن آنام دؤينده
قاپيب آرادان چيخاردين
ائله ايستيليك او ايستك
داها كيمسه ده اولورمي؟
اوره گيم دئيير كي: يوق- يوق
او ده رين صفالي ايستك
منيم او عزيزليگيم تك
سنيله گئديب، توكندي
خان ننه، أزون ديئيردين
كه: سنه بهشت ده، آلله
وئرجك نه ايستيورسن
بو سؤزون ياديندا قالسين
منه قوليني وئريب سن
ائله بير گونوم اولورسا
بيليسن نه ايسته رم من؟
سؤزيمه درست قولاخ وئر:
(سن ايلن اوشاخليق عهدين)
خان ننه آمان، نولِيدي
بير اوشاخليغي تاپايديم
بير ده من سنه چاتايديم
سنيلن قوجاقلاشايديم
سنيلن بير آغلاشايديم
يئنيدن اوشاق اولوركن
قوجاغوندا بير ياتايديم
ائلر بير بهشت اولورسا
داها من ئوز آللاهميمدان
باشقا بير شئ ايستمزديم
تب عشق
یازار : amir
+0 به يه ن
چشم سيه يار دل پير ايلن اوينار
آهوي خطا ديديه باخ شير ايلن اوينار
سالميش اوزه تك خاليني يانديرسين حريفي
ليلاج دغل بازدي تدبير ايلن اوينار
آئينه ده اؤز عكسينه ياريم اولوب عاشيق
صورتگره باخ چكديگي تصوير ايلن اوينار
صبريم كسيلير عُمر آزالير محنتيم آرتار
فوج مژه تا غمزه، پي پير ايلن اوينار
روحيم اوچار از بس كي سيزيلدار دلِ زاريم
مطرب كيمي دستگاه بم و زير ايلن اوينار
اويناتماغا يوخ زولفون اگر اولما مكدّر
ديوانه اولان حلقه ي زنجير ايلن اوينار
مستانه گؤزون اوينادا قاش، ائتمه ملامت
ميخانه ده هر كيم قالا شمشير ايلن اوينار
تؤك خنجر ناز ايله قيزيل قانيمي، دورما
صياد هاچان توتدوغو نخجير ايلن اوينار؟
چوخ ائيلمه پيچ و خم و دستاريله بازي
قورخام ديه لر فتنه دي تزوير ايلن اوينار
اوينار تب عشق ايله وجودوم گئجه گوندوز
صراف دي گويا غم اكسير ايلن اوينار
صراف تبريزي