آهو باخيش!، Ahu Baxiş
یازار : amir
+0 به يه ن
مئي دن مي قيزارميش، گؤزه ليم، عارض ِآليـن؟
يا عكس ساليب ساغره خـورشيـدِ جمـاليـن؟
چيـن ايلـه ختـا چـؤللـرينـي سـالـدي نظــردن
شكين ساچين، آهو باخيشين، هندوي خالين
سن حُسنـده خـورشيـدِ فلكـدن ده گـؤزه لسـن
يـا اه يـري قـاشينـدان نـه يـي آرتيقـدي هـلاليـن
بـالمـره كـؤنـولـدن غـم ِهيجـرانـي
اونـوتــدوم
لـذّت وئـريـر عشـق اهلينـه گـولـزارِ وصـاليــن
چوخ نازلي گؤزه للر يئتيـريبـديـر قـوجـا
دونيـا
مينـدن بيـري اولمـاز يئنـه مــاننــد و مثــاليــن
يوخدور سنـه بنـزر، گـؤزه ليـم، بيـر گـولِ رعنـا
گول اوزلولرين توپـلاسـالار جملـه مـاحـاليـن
واحد، يئنه مجنونوسان اول شوخون، ائشيتديم
بيچاره، سنين ده يـوخ ايميـش عقـل و كمـاليـن
علژاحد
من سني سئويرم سنده مني سئو
یازار : amir
+0 به يه ن
من سني سئويرم نازلي ديلبريم
گل سن ده بو ائلي بو وطني سئو
سون مني عشقينده امتحانا چك
دوزگون عاشيق اولسام سن ده مني سئو
سئو گيليم عاشيقم گول ياناقينا
شكر سؤزلرينه بال دوداقينا
قوي قدم شوقيله آرزي باغينا
من بير شيدا بولبول سن چمني سئو
بو ائلي بو ديلي بو وطني سئو
من سني سئويرم سنده مني سئو
علي ميثمي
منه نه؟
یازار : amir
+0 به يه ن
آيريليق اؤغور اولسون يؤلونا
بوندان سؤنرا سئومه ييندن منه نه؟
خاطيره مده گؤز ياشلارين قالاجاق
كينايه لي گولمه ييندن منه نه؟
هر گوناهي قباحتين بيلمه دين
محبّتين يولو چتين، بيلمه دين
بو سئوگي نين سعادتين بيلمه دين
بوندان سؤنرا بيلمه ييندن منه نه؟
خاطيره ن يؤخ عؤمروم بويو ساخلاييم
ديء، هارداسان، هر دن گليب يؤخلاييم
گؤزلريمده ياش قالماييب آغلاييم
بوندان سؤنرا سيلمه ييندن منه نه؟
قؤپوب گئتدي سؤن اوميدين يارپاغي
حسرت اَكيب، درد بؤيودور تؤرپاغي
سن اؤلمادين دردلريمين اؤرتاغي
بوندان سونرا بؤلمه ييندن منه نه؟
بو سئوگي ده دوز سؤزونو گؤرمه ديم
اؤزگه اؤلدون هئچ اؤزونو گؤرمه ديم
ساغليغيندا خوش اوزونو گؤرمه ديم
بوندان سؤنرا اؤلمه ييندن منه نه؟
نصرت كسمنلي
استفاده يئري
یازار : amir
+0 به يه ن
لبينده عاشقه اوْلسـايدي استـفاده يئــري
قدح ده قانه دؤنوب قالماز ايـدي باده يئــري
ديـار عشقـــه كؤنـول ، لا ابالي قوْيما قـــدم
بو بارگاهــه گئدر كــن ، بيــر اعتقــاده يئـري
اراده سيزلـره يئــر يوخــدو عشـق مولكـونده
خوشــا اوْل عاشقــه وار اوْنـدا بير اراده يئري
شــراب مجـلسينه قوْيماييـن گله نده رقيــب
ده گيــل بو گوشـه جنت حــرام زاده يئــــري
سـنين گؤزلليگينين عاجـــزم افــاده ســـينه
مله كــدن اؤزگه سـنه تاپمـاديم افاده يئــري
تكبر اهليني عشق ايچره ايسته مه ز جانان
طريـق عشقــه كـؤنـول ، دائمـاً فتــاده يئــري
ديــار عشقــــده واحـــــد ، هامي برابر ديـــر
بيلينمه ز اوْردا گــــدا ايله شاهـــزاده يئــري
اولماز
یازار : amir
+0 به يه ن
اگر اينسان حكيم اولسا ، اسير روزگار اولماز
بو بئش گون عمره خاطير ، نفس شومه دستيار اولماز
سليمانلار گئديبلر دست خالي قبره دونيادان
نقدير اولسا اينسانين جلالي ، پايدار اولماز
شكوه و فر جاويدان ، فقط مخصوص سبحان دير
اجل حكمي گلنده ، هئچ كسه راه فرار اولماز
بو سؤزلر منتسب دير مكتب شاه ولايتدن
بويوردو ثروت و مكنت دليل افتخار اولماز
بشرده اولسا حريت ، اؤزون دونيايه سينديرماز
شرافتمند اولان اينسان ، قالار آج روشوه خوار اولماز
اگر اينسان بير آز فيكر ائيله سئيدي متن قرآنه
بيلردي هئچ حقيقت پيشه اينسان ظلم كار اولماز
بلاي فقر و نكبت دن قاچيرلار قيزلار ائولردن
مساوات اولسا، عدل اولسا ، بو قدري انتحار اولماز
بو بير امر مسلم دير ، درآمدلر حلال اولسا
بو قدري كوچه و بازارده بي بند و بار اولماز
گلين آي باشرافتلر ، چكيب تخت دن سالاخ فقري
برابر اولسا اينسانلار ، شرافت داغدار اولماز
گئديرسن مكه يه هر ايل ، دئييرسن عاشقم حجه ؟
ولي مين حجه گئتسن ، هئچ بيرينده اعتبار اولماز
تبرا ائيله شيطاندان ، سورا گئت حجه اي حاجي
وگرنه مكه ده شيطانه ، شيطان سنگسار اولماز
اگر مين ايل اوروج توتسان ، همان قرآنه آند اولسون
اگر آج ياتسا بير اينسان ، رضا پروردگار اولماز
غفاري اردبيلي