غم يئمه!
یازار : amir
+0 به يه ن
ماه كنعانين باتيب، اي پير كنعان، غم يئمه!
تا گلستانين اولوبدور بيت احزان، غم يئمه!
اي دل محنت زده، اول شاد، لبريز سرور
كسب نامردي قيلار افكار وجدان، غم يئمه!
اولمادي مقصوديميزجه دور چرخ كج مدار
قالمالي دير بئيله حالت اوزره دوران پايدار
قسمتيندير، ائتگيلن هم روز و شب ناله، زار
اي رعيت، اي فقير و فعله، دهقان، غم يئمه!
صبح تئزدن دور آياغا، شامه تك چك زحمتي
گوجلولردن ده ائشيت هر نوع فحش و تهمتي
سن ذليل اول، عيبي يوخ، قوي گوجلو چكسين لذتي
قوي سني خوار ائيله سينلر خان و اعيان، غم يئمه!
ايشله قوي قدين بوكولسون، ايشله، آلنين ترله سين!
ايشله، آج قال، آج بهايم تك عيالين چرله سين
ظلمدن فرياد و دادي قوي ديلين ازبرله سين
غارت ائتسين روزيني ملا و بگ، خان غم يئمه!
چك گيلن عمرون چاتينجا، بينوا، آه و فغان
بئيله پنهان سرّيلر اولماز سنه هرگز بيان
ملا نصر الدين، «لسان الغيبه» اولدون ترجمان
روح پاكندير سنين هر دم ثنا خوان، غم يئمه!
ميرزا علي اكبر صابر
واي، واي، نه يامان مشكله دوشدي ايشيم، الله!
یازار : amir
+0 به يه ن
واي، واي، نه يامان مشكله دوشدي ايشيم، الله!
فرياديمه يئت كيم، يانيرام آتشه، بالله!
اسلامه خلل قاتمادادير بير نئچه بدخواه
ايسترلر اولا بنده لرين طاغي و گمراه
ائتديم نه يامان عصره تصادف، آمان اي واي
لا حول و لا قوة الا بالله!
مكتب لر آچيب ائيله يين احساني- دئييرلر
مكتبده قويون «اوستولو»، داسقاني- دئييرلر
پر پوچ ائله يين چوب فلقاني- دئييرلر
ديشره چيخارين حضرت ملاني- دئييرلر
ملا قاوولا، يعني معلم گله واه!... واه!...
لا حول و لا قوة الا بالله!
من آنلاميرام كيم، نولا معناي معلم
قيرخ- اللي منات پول آلا هر آي معلم
بير تازه اصوله اولا ايفاي معلم
پوللاري آلا، سؤيله يه، اوخفقاي معلم
ملا اونا حسرتله چكه كوچه ده آه!...آه!...
لا حول و لا قوة الا بالله!
بير ايلدي، بير آز چوخ دا اولور، يوخدي دماغيم
نه چاتير اليم بير ايشه، نه گئدير اياغيم
هر دن يئني بير سوز دانيشير اوغلان- اوشاغيم
تاققيلداير، آلله دا شاهيدي، قولاغيم
«پورت آرتور»، حريت، «مانجوريا» قاه- قاه
لا حول و لا قوة الا بالله!
آند اولسون اوتن گونلره، ديوانه اولوبلار
اسلامه ده، ايمانه ده بيگانه اولوبلار
بالله باشيم چيخمايير آيا نه اولوبلار
حريته- مريته مستانه اولوبلار
باه باه... گئنه باه باه... گئنه باه باه... گئنه باه باه
لا حول و لا قوة الا بالله!
آخ، آي كئچن ايللر، نولا بير ده دولانايدين
تازه گئنه بئش يوز ايل اولونجا دايانايدين
علمي، ادبي، فضلي، كمالاتي دانايدين
اي بيلدير، اينيش ايل، نولا اودلاره يانايدين!
تا ائيله مه ييدين ده بو غافل لري آگاه!
لا حول و لا قوة الا بالله!
بيلمم نه ايشيم واردي، باشيم هاردا قاريشدي
علم ايله بئله دوشمن اولان قوم باريشدي
تجديد وفابيرله معارفله ساريشدي
راحت ياتا بيلمم، منه غم موري داريشدي
ائتمكمي اولار بير ده بو اويموشلاري اكراه؟
لا حول و لا قوة الا بالله!
ميرزا علي اكبر صابر
گوزلرينين قاره سينه...................
یازار : amir
+0 به يه ن
سوگيليم زولفون توكوبدور گينه اول شانه سينه
قوربانام زولفونه هم زولفو گزه‌ن شانه سينه
گئجه گوندوز گزرم دلبريمين كوييني من
چونكي يوخ منده لياقت گئدم اول خانه سينه
داليسيجان دوشرم فيكر و خيال ايليه‌رم
دوشجكدير پس هاچان سايه‌م اونون سايه سينه
حوري جنت ده گرك دير گورورم حوري‌ني من
تا كي گوزلر ساتاشير گوزلرينين قاره سينه
دوزدي غمزه اوخونون ياره‌سي كار ائتدي منه
لاكين آرزوم بو دي كي مرهم اولوم ياره سينه
من گونش اولسام اگر سنده گرك مهپاره
بلوالانديق
یازار : amir
+0 به يه ن
عشقه وئرديكجه كونول دردايله دريالانديق
اتك آچديقجا يخيب سدلري دنيالانديق
دويغولار دالغالارا دونمه ده دالديق دولدوق
اوتوروب بارلي باخيشلاردا تماشالانديق
من عطش سن ده گونش عشقيميز آتش آرادا
جلوه لنديكجه دل ذره ده گويالانديق
اولدو لال كار بيزي كور تعبير ائده‌ن تصويرلر
گوردولر هر دورو صاف گوزگوده رويالانديق
گونش‌ين عشقينه مين رشك ايله آچماغدا آغيز
درو گوهر آخيديب لولو لالالانديق
بيزده بير ذره قرار دوتمادي عشق ايله عطش
هئي پريشانليقي آشديق گئنه بلوالانديق
دوشدو فيكر ائتمه چكيمده‌ن داها پير اولدو موغان
هر نفس ده‌ن دم آلاركن ئينه شيدالانديق
آتا بابا سوزلري ۹
یازار : amir
+0 به يه ن
اوزون دانيشانين عمري آز اولار
اوزون قاراليغي يامان دئييل ، قلبين قاراليغي ياماندير
اوزونو خالقا چئويرَنين آرخاسي محكم اولار
اوستا اليدَيمَين ايش حرامدير
اوستا اوغلوندان شاگيرد اولماز
اوستا ميمون قامچيسيز اوينار
اوستادينا كج باخانين گؤزلريندن قان دامار
اوستو بَزَك ،آلتي تَزَك
اوستومو اونلو گؤروب ، آديمي دَييرمانچي چاغيرما
اوغلانا بالاجاليقدا قيز وئرن چوخ اولار
اوغلانين اوغلان اويونو وار ، قيزين قيز اويونو
اوغلونا قيز آختارينجا، قيزينا اوغلان آختار
اوغلونا قيز آختارينجا، قيزينا اوغلان آختار
اوغول آتانين كؤوشنين اَكر
اوغول اؤلسه جيگريم يانار، قارداش اؤلسه بئليم بوكولر
اوغول اناسي گاه دؤشونه وورار، گاه باشينا
اوغول مئيوه دير، آتا باغبان
اوغولون سئون گلينين سئور، قيزيني سئون كورَكنين
اوّل دانيش ،سونرا گول
اوّل دوشون ، سونرا دانيش
اوّل سلام سونرا كلام
اوّل طعام، سونرا كلام
اوّل قاپيني دؤي ، سونرا قوناق اول
اوّل قاچان جانيني قورتارار
اولاجاغا چاره يوخدور
اولاماغيني بيلمَيَن كؤپك ، سورويه قورد گتيرر
اولان اولدو ، توربا دولدو
اولان دؤرد باغلار، اولمايان درد باغلار
اولاندا گؤز قيزارار ، اولماياندا اوز اولدوز چوخسا ، آي بيردير
اولمايانين بير دردي وار ، اولانين اون بير
اوّلي ميدان اولانين آخيري زندان اولار
اون اؤلچ بير بيچ
اون ايكي اماما يالوارينجا ، بير آللاها يالمار
اويناشا اومود اولان اَرسيز قالار ، قونشويا اومود اولان شامسي
اويناشدان اَر اولماز
اويناماق بيلمز ، يئريم داردي دئير