آيا بنزر او گوزل آلدانار هر ياغلي ديله
یازار : amir
+0 به يه ن
آيا بنزر اوْ گؤزل آلدانار هر ياغلي ديله.
كيشي ايستر كي، يوْلون ريشه‌سيني آلسين اله.
كيم كي قافيلدي، اوْ راحتدي سسيندن طبيلين،
بيز اۆرك وۇرغوسونو يوْخلاياريق نبضي ايله.
اؤزونو اؤيمك اؤزو جهله برابر كيميدير،
گؤدك اوْلسا ليباسين قوْرخوسو يوْخدور ازيله.
حيله ايله هۆنري هاردا گؤروبسن بير اوْلا؟!
تۆلكولر اوْولاياني اوْولاماييبدير شير هله.
دۆشمني عاجيز حساب ائيله‌مك عاجيزليك اوْلار،
چوْخ زامان گيزله‌ديلير چؤر-چؤپون آلتيندا تله.
گؤز ياشي صايبي آلميش آرايا حاله كيمي،
نئجه كي، حاله چكيب دؤوره‌سينه آي دا، بئله.
صائب تبريزي
قيلسا وصلين شاميمي صوبحه برابر، يوخ عجب
یازار : amir
+0 به يه ن
قيلسا وصلين شاميمي صوبحه برابر، يوخ عجب؛
رسمدير فصلي-باهار اولماق برابر روزو شب.
گون كي، ساين دوشدويو يئردن دورار، بير وجهي وار،
گلسه آليقدرلر فقر اهلي دورماقدير ادب.
اولمادان مئيخانه‌ي-عشقينده مستي-جامي-زؤوق،
دوزمه‌دي بزمي-فلكده زؤهره قانوني-ترب.
جنّتي-وصليندير اول مقصد كي، ايمان اهلينه،
قيلسا حق روزي جهنم آتشي، اولدور سبب.
قاليبا مقصد وصاليندير كي، دون-گون دورماييب
چرخ سرگردان گزر، بيلمز نه دير رنجو تب.
بسته‌ي-زنجيري-زولفوندور نسيمي-ترمزاج،
تشنه‌ي-جامي-ويصاليندير موحيطي-خوشگلب.
قيلما فئيضي-نعمتي-وصلين فضوليدن ديريغ،
حكيم ملا محمد فضولي
توركون ديلي
یازار : amir
+0 به يه ن
توركون ديلي تك سئوگي‌لي ايستك‌لي ديل اولماز
اوزگه ديلئ قاتسان, بو اصيل ديل اصيل اولماز.
اوز شئعريني فارسا, عربه قاتماسا شاعر,
شئعري ائشيدن‌لر, اوخويان‌لار كسيل اولماز.
پشميش كيمي شئعرين ده گرك دادي-دوزو اولسون,
كند اهلي بيلر‌لر كي, دوشابسيز خشيل اولماز.
سؤز‌لر ده جواهير كيميدير, اصلي بدل‌دن,
تشخيس وئرن اولسا بو قد"ر ذير-ذيبيل اولماز.
شاعر اولا بيلمزس"ن, آنان دوغماسا شاعر,
ميس‌سن آ بالام, هر ساري كؤينك قيزيل اولماز.
اوتمز, اوخوماز بولبولو سالسان قفس ايچره,
داغ-داشدا دوغولموش دلي جئيران هميل اولماز.
اينسان اودور, دوتسون بو ذليل خالقين الين‌دن,
اللهي سئور‌سن, بئله اينسان ذليل اولماز.
هر چند سرابين سودو جوخ, ياغ-بالي چوخدور,
باش عرصه ده چات‌ديرسا سراب اردبيل اولماز.
ميللت قمي اولسا بو چوجوك‌لار چؤپه دؤنمز,
ارباب‌لاريميز‌دان دا قارين‌لار تبيل اولماز.
من‌دن ده نه ظاليم اوغلوم, نه قيساسچي,
بير دفعه بونو قان كي, ايپك‌دن قزيل اولماز.
دوز واختدا دولار تاختا-تاباق ائدوييه ايله,
اوندا كي, ننم سانجيلانار, ذنجفيل اولماز.
فارس شاعري چوخ سؤز‌لري بيز‌دن آپارميش,
صابير كيمي بير سوفره‌لي شاعر پاخيل اولماز.
توركون مثلي, فولكلورو دونيادا تك‌دير,
خان يورغاني, كند ايچره مثل‌دير, ميتيل اولماز.
آذر قوشونو قئيسري-رومو اسير ائتميش,
كسرا سؤزودور, بير بئله تاريخ ناغيل اولماز.
بو شهريارين تبعي كيمي چيممه‌لي چئشمه,
كؤوسر اولا بيلسه دئميرم, سلسبيل اولماز.
شهريار ملك سخن
چكه جم
یازار : amir
+0 به يه ن
بير ائلي بوراندا قاردا چكه جم
بيرائلي باهاردا واردا چكه جم
بير شكيل چكه جم گوزگيله سينه
آرزيلار دوزوله سيل سيله سينه
بير باهار سالاجام قيش چيله سينه
بير لالا خونچاسين قاردا چكه جم
بير داغي چكه جم دومان ايچينده
بير ياخشي بيتره م يامان ايچينده
بير حققي دوغرولدام گومان ايچينده
شاختادا بير آغاج باردا چكه جم
بير سئلي چكه جم سارا قوينوندا
بير ائلي يارديم سيز يارا قوينوندا
بير ديلي ديلچك سيز داردا چكه جم
تيكيلي بير آغيز چكه جم بوما
بير درين باخيش كي فيكيره جوما
يوللايام شكيلين تهرانا قوما
بير ائلين يوخلوقون واردا چكه جم
بير ايشيق چكه جم اوزاقدان آتيب
بير دنيز چكه جم دنيزه باتيب
بير ائلي چكه جم مين ايلدي ياتيب
وارليغين بيلميره م هاردا چكه جم
نيله ييم ديل سيز بير باش چكه نميرم
ائليمين گوزونده ياش چكه نميرم
بو ائلين ماهني سين تاردا چكه جم
ائليمي باهاردا واردا چكه جم
هوشنگ جعفري
كوسموشم
یازار : amir
+0 به يه ن
دوزموشوم اول قدر هجرانه دوزومدن كوسموشم
اوزموشم اميد وصلتدن اوزومدن كوسموشم
اويموشام ايللر بو ظاهربين گوزون فتواسينه
اَيري لر دوز گورموشم، از بس گوزومدن كوسموشم
گورموشم چون مصلحت چنگنده طبعيم رام اولور
ائلدن الهام آلديغيم شيرين سوزومدن كوسموشم
تكجه عاصم سونمه يير سينه مده عشقين آتشي
سانما بئش گونلوگ سمندر تك كوزومدن كوسموشم