دوستلار گوروشو.......................
یازار : amir
+0 به يه ن
دوستلار گوروشونه آنا يوردومدان
كونول بوقچاسيندا سوز گتيرميشم
ادب باغچاسيندا سولماز گوللره
آراز كيمين آغلار گوز گتيرميشم
دالغالي دنيز تك جوشوب چاغلايان
ائلر ياراسيني آچيب باغلايان
چئوريب بولودا قان ياش آغلايان
شعريزه بير چيمديك دوز گتيرميشم
اولو بابالاردان يادگارلارا
عاشيقلار جمعينده بسته كارلارا
تايسيز ايگيدلره وورغون يارلارا
منده بير وورغونام اوز گتيرميشم
شعرين اوجاغيندان قالخان كوزلره
اوزون گئجه لرده اوياق گوزلره
سينه لر ياتاغي اودلو سوزلره
سولطان ساوالاندان بوز گتيرميشم
وورغونام او آيدين گئتديگيز يولا
نه ساغا باغلي سيز نه ده كي سولا
گلميشم سيزيلن وئرم قول قولا
خورجوندا نه ييم وار دوز گتيرميشم
محبت ايپه گين آچيب سرمه گه
كونلوزون آغري سين بر آز درمه گه
ظولماتا گونش تك سينه گرمه گه
يانيقلي سازيمدا كوز گتيرميشم
ائشيتديم سوز قيزين بوردا آلان وار
عاصيمين باغيري تك داردا قالان وار
غزل باغچاسيندا نغمه چالان وار
قارا تئل سارا تك قيز گتيرميشم
من آنا يوردومون بير ديلمانجي يام
بير جوما آرزي يام، شعرم، سانجي يام
دنيزلر اونونده ايتگين دامجي يام
گونشه ديرماشان توز گتيرميشم
اوستادعاصم
نه دن؟
یازار : amir
+0 به يه ن
بوباغين بولبولو بيرده ن بيره لال اولدو نه دن؟
قوزقونا قارقايا جولانه مجال اولدو نه دن؟
شانلي يازكسميشيدي قاره قيشين بوز نفسين
يازا چيخميش صونالار غرق ملال اولدو نه دن؟
هانكي صرصر الي پرپر ائله دي گول چيچگي
بو برومند آغاجين ميوه سي كال اولدو نه دن؟
بيز كي جان جان دئمه ديك اولكه ده قان قان دئينه
سئوگي منظومه سي حال اهلينه قال اولدو نه دن؟
مِيِ انگوري سؤزوم يوخ كي حرام ايدي بيزه
انسانين قانيني نوش ائتمه ك حلال اولدو نه دن؟
بيز بيلرديك كي دوغولماز يئني دن رستم زال
يوردون حرّاجه قويان رستم زال اولدو نه دن؟
ايسته ديك سيره چيخاق ماوي سمالرده بير آن
سيندي قُول ياندي قاناد سير محال اولدو نه دن؟
آي كيمين آيدين يدي (عاصمه) ناحقّيله حق
پس حقين قامت موزونو هلال اولدو نه دن؟
عاصم اردبيلي
هرزه سؤز سؤيله ينه ياخشي جواب سوسماقدير
یازار : amir
+0 به يه ن
او آجي سئوزلره صبرائيله يرك دؤزدوم من
چون كمال اهلي اولان ناكام اولور سئزديم من
هرزه سؤز سؤيله ينه ياخشي جواب سوسماقدير
سوساراق هاي قوپاران هرزه ديلي اؤزدوم من
كاما چاتماق ديله يرسن ائلي چاتدير كامينا
بونو گؤردوم هارا گئتديم هاراني گزديم من
اوديله سن مومو بير يئرده نئجه ساخلاياسان؟
آتشيمله پولادي موم كيمي بيل ازديم من
اونودوبلار سني صائب يادا سالماز كيمسه
درديمي لعليله داغ سينه سينه يازديم من
دريا ائله ديم
یازار : amir
+0 به يه ن
تركي بير چشمه ايسه، من اوني دريا ائله ديم
بير سويرق معركه ني محشر كبرا ائله ديم
بير ايشيلتيدي سها اولدوزي تك گورسنمز
گوز ياشيلما من اوني عقد ثريا ائله ديم
اميديم وار كه بو دريا هله اقيانوس اولا
اونا ضامن بو زمينه كه مهيا ائله ديم
عرفانا چاتماسا شعر و ادب ابقا اولماز
من ده عرفانه چاتيب شعريمي ابقا ائله ديم
ابديتله ياناشديم دوغولا حافظه تاي
شيرازين شاهچراغين تبريزه اهدا ائله ديم
تركي نين جانيني آلميشدي حياسيز طاغوت
من حيات آلديم اونا، حق ايچون احيا ائله ديم
(فيض روح القدس) اولدي مدديم حافظ تك
من ده حافظ كيمي اعجاز مسيحا ائله ديم
قمه قداره لر آغزيندا ديل اولميشدي سوگوش
من سه وينج ائتديم اوني، خنجري خرما ائله ديم
ايندي گويلرده گوزل صفله صفا ايله گزير
منجلابلاردا اوزن اردگي دورنا ائله ديم
باخ كه(حيدر بابا)افسانه تك اولموش بير قاف
من كيچيك بير داغي سر منزل عنقا ائله ديم
بوردا(روشن ضميرين)ده هنرين ياد ائده ليم
من اون دا قلمين طوطي گويا ائله ديم
نه تك ايراندا منيم ولوله سالميش قلميم
باخ كه تركيه ده، قافقازدا نه غوغا ائله ديم
باخ كه تهراندا نه شاعرلري شيدا ائله ديم
هم(سهنديه) سهندين داغين ائتدي باش اوجا
هممن ئوز قارداشيمين حقيني ايفا ائله ديم
آجي ديللرده شيرين تركي اولوردي حنظل
من شيرين ديللره قاتديم اوني حلوا ائله ديم
هر نه قالميشدي كئچنلردن اونا بال پتگي
اريديب موملو بالين شهد مصفا ائله ديم
تركي، واللاه، آنالار اوخشاغي، لايلاي ديلي دير
درديمي من بو دوا ايله مداوا ائله ديم
شهريار، حيف ساووخدير بو دگيرمان هله ده
دارتماغا يوخدي دني، من ده مدارا ائله ديم
اوستاد شهريار
آتا بابا سوزلري ۷
یازار : amir
+0 به يه ن
اؤردك گليب قاز اولماز، گلين گليب قيز اولماز
اؤردَگي باغلاماغا ايپك گرك ، يار ايله اويناماغااورَك گرك
اؤردَگي سو ايله قورخوتمازلار
ائرمني دن شاهيد ايستَديلر ، اوزوم آياقلايان گتيردي
اؤز آديني اؤزگه لره قويما
اؤز اؤزونه ائيلَيَنه چاره يوخدور
اؤز ائولرينين تولكوسو ، اؤزگه ائوينين آسلاني دير
اؤز ائويمين نؤكرييَم ، اؤزگه ائوينين آغاسي
اؤز ائوينده اؤز باشيني باغلايا بيلمير ، اؤزگه ائوينده گلين باشي باغلايير
اؤز چؤرَگيني اؤزگه سوفره سينده يئمه
اؤز عاغليني اؤزگه عاغلينا وئرمه
اؤز قدريني بيلمَيَنين قدريني اؤزگه سي ده بيلمز
اؤز قورو چؤرَييم ، اؤزگه نين پيلوووندان ياخشيدير
اؤز كؤوشنينده اوتلايان مال آج قالماز
اؤز گؤزونده بايقوشون بالاسي ، تاووس قوشوندان دا گؤزلدير
اؤز گؤزونده تيري گؤرمور، اؤزگه گؤزونده قيل سئچير
اؤز گؤزونده ديرَگي گؤرمور، اؤزگه گؤزونده چؤپو گؤرور
اؤزو عدالتلي اولانين قاضييا احتياجي اولماز
اؤزو قازانمايان مال قدريني بيلمز
اؤزو ييخيلان آغلاماز
اؤزون باخما سؤزونه باخ
اؤزوندن قوّتلي ايله آياق چكمه
اؤزونده اولماياندا قونشويا گئدرسن ، قونشوندا اولماياندا هارا گئدرسن ؟
اؤزونو ياستا بيلسن ، يولداشيني اؤلموش بيل
اؤزونو باشقاسينا نرديوان ائيلَمه
اؤزونه حرمت قويمايان ، اؤزگَيه ده حرمت قويماز
اؤزونه قييماديغيني ، اؤزگيَه ده قييما
ائششك نه بيلير زعفران نه دير؟
اؤكوز اؤزونه يونجا اَكنده باشي آغرييار اؤكوز اؤلدو، اورتاق آيريلدي
اؤكوز اؤلر گونو قالار، ايگيد اؤلر اونو( شهرت) قالار
اؤكوز اؤلمَيينجه اينگه قيمت اولماز
اؤكوز اولاجاق دانا پوخوندان بيلينر
اؤكوزو اولانا بورج گون وئرلر
اؤلموش آتا يوك چاتمازلار
اؤلموش آسلانا دووشانلار دا هجوم ائيلر
اؤلموش آسلاندان دير كؤپك ياخشيدير
اؤلموش دوه نين دريسي بير ائششگه يوكدور
اؤلَنين بورجونو باققال ديريلره يوكلر
اؤلو آسلانين ساققاليني يولارلار
اؤلوسو اولان بير گون آغلار ، دليسي اولان هر گون آغلار
اؤلوم وار آرلوم كيمي ، اؤلوم وار ظولوم كيمي
اؤلونو بير دفعه يويارلار
اؤلونون وصيّتي اؤزو ايله گئدر
ائله ائيله كي ، بيرده بازارا شور ساتان گلسين
ائله ايش توت كي، ايچيندن قنبر قولو چيخماسين
ائله باغين بئله ده مئيوه سي اولار