خلقه بولود كيمي... «نادر الهي»
یازار : amir
+0 به يه ن
خلقه بولود كيمي ايللر آغلاديم
هئچ اوزومه بيرگون آغلاماديم من
خلقه قيزيل سَراي باشي باغلاديم
اُوزومه نون باشي باغلاماديم من
***
اي گُوزل ! باشيمدان چيخمادي هاوان
دردين...يوخ ، يوخ...مني اؤلدوردو داوان
ايللر بويو اولدو يئديگيم ياوان
هئچ قولدورون بوغون ياغلاماديم من
***
دلي شيطان ديير دور قوي اوز داغا
سونا كهليك كيمي ينه سوز داغا
دؤزدوم دوست اليندن نئجه يوز داغا
هئچ اليمين اوستون داغلاماديم من
***
نادرم سينَه مدَه سيزيلدار يارام
عشقينده ، گوزليم ، اؤلونجه وارام
دييرديم درديندن داها ديغلارام
نه جانيم برك ايميش...ديغلاماديم من
*********
گؤردو بالتالارين...
گؤردو بالتالارين هجوم چكمه سين
گيزله نه بيلمه دي ... قاچا بيلمه دي
تورپاق ائشيتمه دي گيلئي ليك سسين
اوره يين هئچ كيمه آچا بيلمه دي
اوره يين آچمادي او هئچ بيركَسَه
دوغراندي ...
توكولدو...
عادي دن عادي ...
اياغي آلتداكي تورپاقدان ... نَه سَه
ديري ايكن بير آدديم دالي قويمادي
باخيرسان اوره يي جادار جاداردي
اگر ديله گلسه قوزوتك مَلَه ر
بيلميرم ... نه سيردي...
هله كي واردي
كَسيلَه كَسيلَه قاليب مئشه لر
اوزگه ديله يازمارام (وحيد شكرزاده )
یازار : amir
+0 به يه ن
Nazlı şirin dil varım, özgə dilə yazmaram
Cənnəti versəz mənə, dünyanı satsaz mənə
Şəhrıyarım düz deyıb, qatma dilin dillərə
Bax bü dilin sayəsi, gəzdi adım dillərə
Onda ki mən ölmüşəm, qurlayın öz yurduma
Qəbrimin üstündə siz, Türkü bü şeiri yazın
دوغراسالاردا مني اُوز ديليمي آتمارام
من آنامين ناز ديلين باشقا ديله ساتمارام
من بو گوزل تورك ديلين آيري ديله قاتمارام
اولماسا گر بو ديليم هئچ يئره من چاتمارام
چون بودور عادت منيم ئوزگه يئره ياتمارام
اوز ديليمي آتمارام ، باشقا ديله ساتمارام
شاعير : وحيد شكرزاده
Oxulsuz dil
یازار : amir
+0 به يه ن
مني قينايير ننه م
اوخولوموز يوخدور كي
اوز ديليمي اويره نم
بولبول كيمي سويله رم
سوروشسالار (يك و دو )
فارسجا ياخشي بيله رم
اويرنديگيم بودور- بو
توركجه دانيشسام، سوزوم
اسگيك گلر، قورتولار
اولر اوزومده اوزوم
ديليم سوسار، توتولار
آنا ديلين آنلامين
اونوتموشام دوغروسو
اونوتقان بير آدامين
گئدر بير گون آبروسو
من بير يانا، آنام دا
هله سني اونودوب
ايندي آنجاق آتام دا
اينمز- دينمز اوتوروب
نئجه دئييم سنه من
آنا ديلي، آي ديليم
سني سوراندا هردن
آنام دئيير: نه بيليم!
سن قورقودون ديلي ايدين
يادلار سني أيديلر
بويوك يوردون ديلي ايدين
خاطيرينه ده يديلر
آنام سنله ياييقسا
يئنه آنا ديليمسن
دويغولاريم آييقسا
ابدي نيسگيليمسن!
آنا يوردومدن قيزي
یازار : amir
+0 به يه ن
سارا بير آيدي بيزيم ائللره، آيسيز گئجه لر
بير اوجا سسدي قولاق وئر اونا هايسيز گئجه لر
سارا بير باغدي طبيعتدن آليب قول بوداقي
بير شيرين ماهنيدي يانليز اوخويار ائل دوداقي
سارا بير قيزدي سودان سورمه چكيب گؤزلرينه
جان دئييب بيرده اوركدن آرازين سؤزلرينه
سارا سئودا ايله دونياني آتان بير قيزدي
سارا غملر اوجاقينادا آليشان بير كؤزدي
بير نجابتلي گلين دير ائله آسلان ساياغي
قويمادي تار ائده دونياسيني چاققال آياقي
اؤزونو آتدي سئله اؤزگه ني حئيران ائله دي
او يانان شمعيني پروانه يه قربان ائله دي
قوشولوب سئللره گئتدي آنا يوردون ساراسي
قالدي شيرين اوره گينده يئنه فرهاد ياراسي
باغلادي ساچلاريني قويمادي بيگانه گؤره
آنا يوردون قيزي وئرمز ساچين هر كيمسه هؤره
گلين اولدو آرازا، اوردا تويون توتدو سارا
سؤيله دي اوردا اورك سؤزلريني نازلي يارا
آراز آغلار گؤز ايله، آلدي سارا اللريني
دارادي ائل قيزينين بيرده قارا تئللريني
گئتدي گؤزلردن اوزاق دوشدو ائلين بيردنه سي
گؤرمه دي خان چوبانين آيريليقين سون نفسي
سارا گؤزلردن اوزاق دوشسه ده ايتمز اثري
بير ياراق تك سؤزونون واردي هله چوخ كسري
غزل قوشو (ليلي كحالي)
یازار : amir
+0 به يه ن
1.
من او قوشو اؤلدورموشم،
من او قوشو
ديمديگينده غزل قوشو
من او قوشو
باخيشيندا سئوگي قوشو
من او قوشو...
من او قوشو اؤلدورموشم
سينه مده يوواسي واردي
سئوگي يئرينه قان ايچدي
قانادلاري قانا دوشدو
دوشدو قالدي سينه م اوسته
ايچيمده كي آرزي قوشو
من اؤلدورموشم
من او قوشو...
**********************************2.
ياغيش ياغير
ساعاتلاردير
دامجي-دامجي باخيشلارين
پنجره لرده داغيلير
هرنه خاطيره ميز واردي
سئل كوچه لردن آپارير
ائشيكده كي چيلغين هاوا
ايچيمده كي دومان آغير
من آغليرام
ياغيش آغلير
ياغيش ياغير
ساعاتلاردير.
*****************************
3 -
آغاج لار
يول لار
داغ لار!
آغاج لارين بارماق اوجوندا
بير اشارت وار،
سن گئتديگين يوللارا دوغرو.
يوللاري بير باشدان
آمما يوخ هر باشدان
توتوب گئديرم
سني داغلاردا
داغلاردا سني
چاغيريب قايتاريرام
آغاجلارين بارماق اوجوندا
بير اشارت ياراديرام سني
يئنه باشدان-
باشدان...
**********************************
4 -
هئي تاكسي!
لوطفن مني يئتيرين!
يوخاريداكي جادانين
آلتيندان كئچن يولا!
او ساغداكي سولا دؤنون
او خيابانين آدي؟...
گؤزلريم گؤرمور آديني
ياغيش ياغير من آغلاميرام.
- بو كوچه اؤزودور
گؤزلرينده كي نم
دوداقلارينداكي قيفيل،
ائوده دير يالقيزليغيم!
سورون! او پنجره يه كي
آي دوغار سينه سينده
بير آز ايشيق ايستيرم
قورخورام قارانليقدان.
باغيشلايين
مني داغ باشينداكي دومانا يئتيرين
سيرريمي آچماق ايستيرم بولودلارا
قوي! اسفند آيلاريندا
گؤزلريم ياغسين
باهارلارا...
يوخ!
دايانمايين
گئدين
اوزاخ هر يئرده يئنديرين مني!
بوتون يوللاري ترسه سينه گئتمه ييم گلير
چوخ غريبسه ميشم
بو گون شَهَرده
ايتمه ييم گلير!