ياسلي ساوالان
یازار : amir
+0 به يه ن
اوغول اولموش آتا تك گوزلرين آغلار گورورم
هر طرفدن چكيليب سينه وه داغلار گورورم
آي آلان اوستونو غم چيسگيني ، هر ياني دومان
آي ياغان باشينا غملر اودو ، ياسلي ساوالان
گورموشوك يازدا كوچك لرده چيچكلر آچيلار
هر طرفدن چيمنين سينه سينه گول ساچيلار
ماهني لار قوشماغا باشلار يئنه ده قوشماچيلار
ياز گليب گئتدي يئنه گولمه دين اوچ آيدا بير آن
آي ياغان باشينا غملر اودو ، ياسلي ساوالان
قرنيلر گئچدي سنين گولمه دي بير لحظه اوزون
قانلي ياش توكدو سارالميش اوزونه ياشلي گوزون
غصه دن دوندو قارانليق گئجه اولدو گونوزون
نه سوران حاليني اولدي نه وئرن جيسميوه جان
آي ياغان باشينا غملر اودو ، ياسلي ساوالان
آند وئررم سني او قانه بلنميش داشووا
گئجه گوندوز او گوزوندن توكولن قان باشووا
اورگين درديني بيلدير او "سهند" قارداشووا
سني وارليق سني تانري سني بو آه و فغان
آي ياغان باشينا غملر اودو ، ياسلي ساوالان
سالارام ياديما بير لحظه او گئچميش لريوي
توكولن سنگ جفائيله او دور ديشلريوي
ايزلرم بير بير او حئيرت يارادان ايشلريوي
هامي دان من سنين احوالينا آرتيق نيگران
آي ياغان باشينا غملر اودو ، ياسلي ساوالان
ساكيت اول ، آغلاما قوي بيرجه چكيلسين بو دومان
گون چيخيب ظولمني بير يوللوقا قووسون بورادان
"نبي" گلسين ، بو آت اولسون يئنه داغلار آتيلان
"هجر"ين بلكه يغيلسين گوزو يولدان ، آناجان
آي ياغان باشينا غملر اودو ، ياسلي ساوالان
سوندوره بيلمه دي گوز ياشين اوركدن اودووي
چاغيريم قوي كومك ائتسين سنه اوز اولاديوي
افتخاريله بوگون ذيكر ائدرم پاك آديوي
مرد اوغوللار بئجريب خلقه وئرن شوهرت و شان
آي ياغان باشينا غملر اودو ، ياسلي ساوالان
"بابكين"گئتدي سه بوش قالمادي آمما قوجاغين
دولودور مين ائله اوغلانلاريلا هر بوجاغين
نه قدر يئل اسه طوفان قوپا سونمز اوجاقين
اي بلالر سپري ، خالقا يامان گونده آمان
آي ياغان باشينا غملر اودو ، ياسلي ساوالان
چنلي بئلده "ده لي لر " قوي يئنه قورسون بوساطي
قوچ كوراغلو يئنه جولانه گتيرسين قير آتي
هئچ زامان اصلين ايتيرمز او كي دوزگوندي ذاتي
آند اولا آديوا ، آي گوزلري آغلار ، ياشي قان
آي ياغان باشينا غملر اودو ، ياسلي ساوالان
سن دويوشلرده بير آسلان كيمي دوردون اياغا
اوخ آتيلديقجا بيزه سينه ني وئردين قاباغا
غم يئمكدن داها جانيم يئتيشيب دير دوداغا
نه يامان گونلره گور قالدي بو احساسلي بالان
آي ياغان باشينا غملر اودو ، ياسلي ساوالان
بابالاردان بيزه قالميش بو مثل هاممي بيلر
سو ٬ گلن آرخا دئيبلر يئنه بير گون سو گلر
فلكين داش اورگين آه اوخو آخيردا دَئلر
"بارز" اوغلوندا يئتر سئوديگي ياره او زامان
آي ياغان باشينا غملر اودو ، ياسلي ساوالان
ياز درديمي ساغا لتمادي
یازار : amir
+0 به يه ن
ياراما بير قيش باغلايين
گؤيلومه بولود دؤشه يين
گؤزومه ياغيش باغلا يين
***
تاي توشو قول قاناد چالدي
زيروه لرين اوستون آلدي.
چيرپينا چيرپينا قالدي
اوره ييمه قوش باغلايين
***
بوگونلرده كئچدي بلكه
دورنا اولوب كوچدو بلكه
بو قفس ده اوچدو بلكه
اياغيني بوش باغلايين
سن سوسوزسان(نادر الهي)
یازار : amir
+0 به يه ن
سن سوسوزسان ، عطش مني اوُلدورور
بير ايچيم سواولدم ... ايچ مني قورتار
ساري سونبول كيمي حسرتده يانديم
دولو دن ايستدوين ... بيچ مني قورتار
***
قارا بولود كيمي ياغيشا دوللام
آچيلماميش گول تك،غنچه ده سوللام
فتنه سئل تك آخسا،من كُورپون اوللام
مندن كئچمه ليسن...كئچ مني قورتار
***
نـــــــادرم منليـگيم مـحبتيم ديـــــر
فلكين روزيسي ، قانيم اَتيم دير
بير جوت گَوز، واريوخدا ، واردولتيمدير
قوربانليق سئچيرسن ...سِئچ مني قورتار
دونن....
یازار : amir
+0 به يه ن
اوره ييمز ياخين ...اليميز اوزاق
بيريميز گونشده ، بيريميز آيدا
گَل بو سرحدلري آرادان پوزاق
حسرتلي حياتدان آخي نه فايدا ...؟
بوگون ...
اينديسه اللرين الريمده دير
آنجاق اوزاقلاشيب اوركلريميز
دييرم آ گولوم ! فايداسي ندير؟
بير تاوان آلتيندا ياشاساقدا بيز...؟
گونش *شمس اله سيفي (سينا)*
یازار : amir
+0 به يه ن
دورنــالار شـنليگينه قالــخدي آلـــاولاندي گـــونــش
قورخولوقلار يئنه باغلانمادا بايقوش سسينه
آي گئده ركن يئرينه ديرچه ليب آيلاندي گونش
من بو ايديم ازه ليـمده ن او دا گؤرمـوشدي مني
ايلك باخيشدا نه گومانلا منه باغلاندي گونش
گئتدي يول لاردا قويوب آغلاري يورقون گؤزومو
قاپ قارانلـيقدا منـه نورونو قيسقاندي گونش
بـيــر گؤيرچيـن مـنه اؤيـره‌نــمه‌ده تـئـز آيـريـلـدي
باغلانان عهدي سينيب ايلقاريني داندي گونش
هوپولوب كؤنلومه هوپماقدا نه ده‌ن ديسكيندي
يارپايغيمدان سوزولوب اؤزگه يه پايلاندي گونش
من سه هئچ اينجيمه ده‌ن ساخلاياجام شئعريـمده
ده رگيمه نور جالا يان باشداكي عونوان دي گونش