ساري گلين
یازار : amir
+0 به يه ن
گولو قونچا درمزلر
ساري گلين
بوسئودا نه سئودادير
سني منه وئرمزلر
نئيليم آمان ، آمان
ساري گلين
بو دره نين اوزونو
چوبان قايتار قوزونو
نه اوْلا بير گون گؤرم
نازلي ياريمين اوزونو
نئيليم آمان ، آمان
ساري گلين
عاشيق ائللر آيريسي
شانا تئللر آيريسي
آيريسي بير گونونه دؤزمزديم
اوْلدوم ايللر آيريسي
نئيليم آمان ، آمان
ساري گلين
آيريليق
یازار : amir
+0 به يه ن
بو فيكري باشيمدان آتا بيلميرم
دئييرم چون سنه چاتا بيلميرم
آيريليق، آيريليق ، آمان آيريليق
هر بير دردن اولار يامان آيريليق
اوزوندور هيجرينده قارا گئجه لر
بيلميرم من گئديم هارا گئجه لر
ووروبدور قلبيمه يارا گئجه لر
آيريليق، آيريليق ، آمان آيريليق
هر بير دردن اولار يامان آيريليق
ياديما دوشنده آلا گوزلرين
گويده اولدوزلاردان آلاّم خبرين
نئيله ييم كسيبدير مندن نظرين
آيريليق، آيريليق ، آمان آيريليق
هر بير دردن اولار يامان آيريليق
آيريليق درديني چكمه ين بيلمز
ياردان آيري دوشن گوز ياشين سيلمز
دئييرلر اينتظار خسته سي اؤلمز
آيريليق، آيريليق ، آمان آيريليق
هر بير دردن اولار يامان آيريليق
نئجه كي ائليمدن آيري دوشندن
سورار بيربيريني گوروب بيلندن
حسرتله سيزلار يار داييم بو غمدن
آيريليق، آيريليق ، آمان آيريليق
هر بير دردن اولار يامان آيريليق
ايل لردي اوزاقام آرخام ائليم دن
بلبلم دوشموشم آيري گولوم دن
جور ايله آييريب شيرين ديليم دن
آيريليق، آيريليق ، آمان آيريليق
هر بير دردن اولار يامان آيريليق
اولوبدور بيگانه ياريم_ يولداشيم
غريبه ساييلير سئوگيم – سيرداشيم
بوجاوان چاقيمدا آغارديب باشيم
آيريليق، آيريليق ، آمان آيريليق
هر بير دردن اولار يامان آيريليق
مني آغلاداندان گولوش ايسته رم
آيري دوشنيمله گوروش ايسته رم
حصاري ييخماقا يوروش ايسته رم
آيريليق، آيريليق ، آمان آيريليق
هر بير دردن اولار يامان آيريليق
سئوگيليك اولوبدور شاني فرهادين
سئوگي سي هاردادير ،هاني فرهادين
دييه ره ك چيخاجاق جاني فرهادين
آيريليق، آيريليق ، آمان آيريليق
هر بير دردن اولار يامان آيريليق
ياشيل قاناد
یازار : amir
+0 به يه ن
بير جوت ياشيل قاناد گويه رير منده سئوگيليم
اوچماق سنينله خوشدو نه وار سنده سئوگيليم؟
سندن منيم باشيم ساوالان تك اولوب اوجا
وولكاندا داغ باشيندا اولار چنده سئوگيليم
قويدون مني يامان گونه گئتدين اوزاقلارا
دوستوم دا آغلايير منه دوشمنده سئوگيليم
بير سورغو هئي سورور قانيمي لاب جانيخميشام
سوز آچ منيمله يوخ دا دئسن هنده سئوگيليم
گوي بويدا بير قفسدي بيزيم سئوگيميز دئدين
سندن خوشوم گلير بو قفسدنده سئوگيليم
باخيش(عارف ساساني نين تركي شعرلري)
یازار : amir
+0 به يه ن
اوستاد نادر فريد فتحي 1335 ايلينده ماراغادا دونيايا گوز آچدي و شعيرده آيدين تخلص ائديردي. آيدين جنابلاري فارسي ادبيات رشته سينده فوق ليسانس مدركين آلميشدير و ايللر بويو اوخوللاردا و تانيشلاقلاردا معلمليك كسوتينده تدريس ائديردي.
او ماراغالي شاعير غزل - قصيده و باشقا قاليبلرده شعير يازيبدير. اوستاد آيدين ئوز حياتيندا شهريار و ماراغانين گوجلو شاعيري سهنددن فايدالانميشدير و ماراغانين بويوك شاعير لريله (اوجمله دن اوستاد حيدر عباسي - اوستاد ودود دوستي - فيروز جوادي - محمدرضا مقدسي - مهرداد اميري و اوستاد بابك نجفي ) بير انجمنده فعاليت ائدردي.
اوستاد آيدين نئچه ادبيات و شعير فستيواليندا داور اولموشدور و ماراغانين راديو سيندا دا ايللر بويو چاليشميشدي و ماراغانين اوحدي انجمنينين قوروجولاريندانييدي.
بو گوجلو شاعير و حرمتلي اوستاد نئچه ايل شعير و ادبيات يولوندا چاليشاندان سونرا 2/4/1392 ده قلبي عارضه اثرينده دونياسين دئييشدي. روحو شاد اولسون و مزاري نورلا دولسون.
بير دسته اورك ( اوستاد نادر فريد فتحي نين اولو روحونا ايتحاف)
گؤيلرين اوركي توتولور سن سيز
بولودلار گئييرلر قارا كؤينكي
آي گونش ! ياسيندا آغلايير ياغيش
غملي دير بولودلار اوركيم تكي
يئل اسدي پنجره آچيلدي بيردن
ديسكينديم گؤيلرده ايلديريم شاخدي
دديلر دئييشيب دونياني گئتدين
گئتمه يين جانيمي يانديريب ياخدي
بيليرسن نه واردير؟ سن گئدن گوندن
دونيانين غملري قوجاقيمدادير
بير آدديم آتماديم شنليكه دوغرو
كدردن بير زنجير اياقيمدادير
روباعي غملي دير مثنوي پوزغون
اوخشايير گرايلي آغلايير غزل
گئديبسن داي شعير يئتيم قاليبدير
اودور كي سينه سين داغلايير غزل
حيرانام حيرانام من بوندان قاباق
گؤرمه ديم تورپاقدا گونش قويلانا
گؤرمه ديم من آيي گئده چيينده
سونرادا سيغيشا يئرين قوينونا
تورپاقدان بير كؤينك اينينه گئيدين
دار گلدي بو دونيا سنين اينينه
بير دسته اورك وار مزارين اوسته
سن يوخسان كدر دن دولوبدور سينه
عارف ساساني
اوركيم عشقيني باشدان آتا بيلمز
یازار : amir
+0 به يه ن
اوركيم عشقيني باشدان آتا بيلمز
بير قاريش تورپاقيني دونيايا هئچ واخ ساتا بيلمز
ئوزونو ئوزگه لره هئچ قاتا بيلمز
سنسيز اولسا ياتا بيلمز
اولو تبريز!
آي آنا!
شهريار تك بالا لار ايندي ياتيبلار قوجاغيندا
اوركيم قوش تك اوچوبدور اوتوروبدور بوداغيندا
دونيانين غملي چاغيندا
مني ميندير او گؤزل قونقايا تبريز!
يئنه تاريخده دولاندير
يئنه ده عالمه ستار خاني قايتار
قورويوبدور داهي غيرت داماري گل قاني قايتار
ئولو جيسمه جاني قايتار
اليني قاوزا گؤيه گؤيده كي پروين لري گؤستر
اوركيم آيريليقا بيل كي دؤزنمير
اليني سندن اوزنمير
ئوزگه بير ئولكه ده سنسيز لي گزنمير
سني گؤردوم
باخيشيم بير گونش اولدو
سويا باخديم سو ايشيقلاندي دولاندي
گؤزو يومدوم سو كدر لندي داياندي
بيلميرم سنده نه وار؟
بلكه ياشام بلكه باهار
بلكه ده بير اوركي قانلي پيچاقلانمش نار...
قورخورام سنسيز اولام شعريمي تئز شاختا وورا
نفسيمده دونا قارشيمدا دورا
قورخورام اولمايا بير كس
بو گؤزل شعر اوجاغين بيرده قورا
دي نسيمي دريسين اوستومه چكسين
قويما شاعير ديزه چؤكسون
شهريار ئولكه سي سن
ادبين شانلي داغي چال پاپاغي ائل داياغي
يول قارانليقدي گؤرنمير اوركيم
شمسه دي ساچسين ايشيق يوللاريما
دونيا شاعيرلري سندن هله الهام آلاجاقلار
صائبيندن اوخودوقجا
قلم الدن سالاجاقلار
بو نه سيردير قالاجاقلار
دوزدو كي يئللر اسنده
نازلي گوللر قانينا هي بو يانيبسان
آمما ارگين تكي هيبتلي كولكلر قاباغيندا دايانيبسان
اولو تبريز!
ائليمين سئومه لي گؤيچك گؤلي سنده
داملادير هرنه گؤزلليك سئلي سنده... سئلي سنده...
آخ ....گؤزللر ائلي سنده
سنسيز اولسام دييرم
باشقا ديلك وارسادا زاي دير
ايچدييم بير آجي چاي دير آجي چاي دير
هانسي گؤيچك سنه تاي دير؟
هانسي گؤيچك سنه تاي دير؟