iraniturk

"ايكي جان آواره سي"

بير قانلي اوره ك چيرپينيري قان آراسيندا

                                                       ويرنيخمادادير قالميش ايكي جان آراسيندا

هجرانه دؤزوب يا كي چاليشسين چاتا وصله

                                                        آواره قاليب وصل ايله هجران آراسيندا

چوخ جان آتيري جانيني جانانه يئتيرسين

                                                         سين_ سين گزيري عالم امكان آراسيندا

فكريم يول ايتيرميش غريب آواره دي سانكي

                                                          حيران دولانير برّ و بيان آراسيندا

گون باتميش اذان دير دئيه سن قاش قاراليبدير

                                                         يول اَيريمي بير قورخولو اورمان آراسيندا

ال اوزمه لي يَم يا يئنه ده دؤزمه لي يَم من

                                                          تدبير قيلين بو ايكي بحران آراسيندا

بير خيردا گيلايه يئكه لير اولسون عداوت

                                                           بير عؤمر يئر ائتسين ايكي جانان آراسيندا

جاندا دا مايا قويمالي اولساق يئري واردير

                                                         تا صلح يارانسين بوتون انسان آراسيندا

يوخ غصه سي بير گون ده كوسولسه دوشونن دوست

                                                         لازم دي اوموب_ كوسمه ده خوبان آرسيندا

بير سام يئلي اسجك او كي بيزدن الين اوزدو

                                                         اوندان نه اوماق قورخولو طوفان آراسيندا

حق وئرمه لي ييك حق لي يه هر كيمسه اولا حق

                                                          زور قانونو جنگلده دي حيوان آراسيندا

نقد اولسادا آنجاق ائله دوزگون گرك اولسون

                                                          بير كلمه ده هئچ اولمايا بهتان آراسيندا

بهلول كيمي من ده آغاجي اَت كيمي سوردوم

                                                         هارون لارا سؤز ساپلاديم عنوان آراسيندا

بير گون گله جك يالقيز آدين قالميش اؤزون يوخ

                                                         ائللر دئيه جك آديني دستان آراسيندان

سندن قالاجاق قالسا بو اوچ يئرده نشانه

                                                         آرشيو ايله ويترين ايله ديوان آراسيندا

شايد ده سنين شكلينه هيكل يوناجاقلار

                                                           ائللر گؤره جك شهرده ميدان آراسيندا

                                                                                                          يالقيز

آي بو جهاني خلق ائده ن،لطف ائله بير جهانه باخ

جانه گليبدي بنده لر،بير زادي ائت بهانه ، باخ

من بيليرهم يؤرولموسان،دونيا دايانسا دورموسان

لـيـك دوشـن اَياقــيـدان،بـنـده ي نـاتـوانـه بـــاخ

گوندوز ايشيقدا جورلوسن،بؤينو يؤغونلارين ايشين

بـؤيـنـودا قـيل كـيـمـيـنـلـرين ايـشلـريـنه شـبانه باخ

وار نه قدر بـو حـالـيـمـيز،قـاره دي روزگـاريمـيـز

آنـد ايـچـيـريك يالان سنه،بـيزده اؤلان ايمانه باخ

هاممي دئير كي من دوزه م،بيلميره م ايري كيمدي بس؟

بيربئله ايري ايشـلـري،كـيــم گـؤرورو يالانه بــاخ

اؤرو پيشيك ده كوفته ني،يئيير،دئيير به بيلميسن

تئز سيلير آغزي بورنونو،ياغلي دؤداغ ،دهانه باخ

الـلـي،ايـاقـليـلار قـاپـيـر،ياغـلي ديـلي اؤلان تاپـيـر

ال سـيز ـ اياقـسيز اؤرتادا،غارت اؤلور ،تالانه باخ

صلح سئويرسن آي كيشي ،قؤيما نفاق تؤره لده لر

خلـق آراسـيـنـدا بـيـر بـئـله فـيرتانالار سالانه باخ

اوستونه صافلارين قؤيان،آلتينا زير زيبيل باسان

چؤمچه سيني ووران زامان،گل بو سؤغان ساتانه باخ

سن كي گؤرورسن آنليسان،يؤخ دئمه منده بيلميره م

دوزگون حسابي ايسته سن،چؤرتگيه سال ،قاپانه باخ

بوردا تمام اؤلور سؤزوم،هامميسي يؤخ بير آزجاسي

حـؤصلـه ن اؤلـسـا وئـر قـولاق باقـيـه داسـتـانه بـاخ

صلح اولماسا

گول مني سن ايسته سن عومروم هدر اولماز

صلح اولماسا، اولاد وطن بخته ور اولماز

آزاده ليقي، صولحي سئويلر بيزيم ائللر

بير يئرده كي، صولح اولسا، او يئرده ضرر اولماز

اودلار وطنين نازلي گوزه للر بورويوبدور

ائللرده مثل واركي، گوزل سيز شهر اولماز

آهيم اودو بلكه ائله سين قلبينه تاثير

نيسان سويونو ايچمه يه داشدان گهر اولماز

هيجران گئجه سي، من چكني چكمه سين اغيار

ظننيم جه قيامت گونو بوندان بتر اولماز

زولفون اوزونو توتسادا، گويچك ليگين آرتير

ظلمت گئجه لر اولماسا آيدين سحر اولماز

واحد سنه، غم چكمه رقابت ائدن اولسا

مين گول قووشا بير يئره، بحر خزر اولماز