آنا ديلي - بختيار وهابزاده
یازار : amir
+0 به يه ن
ديل آچاندا ايلك دفعه « آنا » سؤيله ييريك بيز،
« آنا ديلي » آدلانير بيزيم ايلك درسليگيميز.
ايلك ماهنيميز لايلاني آناميز اؤز سودويله
ايچيرير روحوموزا بو ديلده گيله - گيله.
بو ديل بيزيم روحوموز، عشقيميز، جانيميزدير،
بو ديل بير- بيريميزله عهد و پئيمانيميزدير.
بو ديل تانيتميش بيزه بو دونيادا هر شئيي،
بو ديل اجداديميزين بيزه ميراث وئرديگي
قيمتلي خزينه دير…اونو گؤزلريميز تك
قورويوب، نسيللره بيز ده هديه وئرك.
بيزيم اوجا داغلارين سونسوز عظمتيندن،
ياتاغينا سيغمايان چايلارين حيدتيندن،
بو تورپاقدان، بو يئردن،
ائلين باغريندان قوپان يانيقلي نغمه لردن،
گوللرين رنگلريندن، چيچكلرين ايگيندن،
ميل دوزونون، موغانين سونسوز گئنيشليگيندن،
آغ ساچلي بابالارين عقليندن، كاماليندان،
دوشمن اوستونه جومان او قيراتين ناليندان
قوپان سسدن ياراندين.
سن خالقيمين آلديغي ايلك نفسدن ياراندين.
آنا ديليم، سنده دير خالقين عقلي، حيكمتي،
عرب اوغلو مجنونون دردي سنده ديل آچميش.
اوركلره يول آچان فضولي نين صنعتي،
ائي ديليم، قودرتينله دونيالارا يول آچميش.
سنده منيم خالقيمين قهرمانليقلا دولو
تاريخي واراقلانير،
سنده نئچه مين ايلليك منيم مدنيتيم،
شان- شؤهرتيم ساخلانير.
منيم آديم- سانيمسان،
ناموسوم، ويجدانيمسان!
بو ديل تانيتميش بيزه بو دونيادا هر شئيي،
بو ديل اجداديميزين بيزه قويوب گئتديگي
ان قييمتلي ميراثدير، اونو گؤزلريميز تك
قورويوب، نسيللره بيز ده هديه وئرك!
ائي اؤز دوغما ديلينده دانيشماغي عار بيلن
فاسونلو اده بازلار،
قلبينيزي اوخشامير قوشمالار، تئللي سازلار.
بونلار قوي منيم اولسون،
آنجاق وطن چؤرگي،
بير ده آنا اورگي.
سيزلره غنيم اولسون.
بابك