ناز ايله ميسن!
یازار : amir
+0 به يه ن
چوخلار انجيكدي كي، سن اونلارا ناز ايله ميسن
من ده اينجيك كي، منيم نازيمي آز ايلمه ميسن
ائتميسن نازي بو ويرانه كؤنولده سلطان
ائوين آباد اولا، درويشه نياز ايله ميسن
هر باخيشدا چاليبان كيپريگي مضراب كيمي
بير قولاق وئر بو سينيق قلبي نه ساز ايله ميسن؟
باشدان آچ يايليغي افشان ايله سوسن- سنبل
سن بيزيم بايرامميزسان قيشي ياز ايله ميسن
سن گون اول، قوي غم ميز داغدا قار اولسون، اريسين
منيم آنجاق ايشيمي سوز و گداز ايله ميسن
من بو معناده غزل يازمالي حاليم يوخدي
سن جوجوق تك قوجاني فرفره باز، ايله ميسن
كاكلي باشدا بوروب باغلاميسان تاج كيمي
او قيزيل ساچدان اونا، گوللي قوتاز ايله ميسن
سينه بير دشت مغان دير، قوزي يان- يانه ياتيب
منيم آغلار گوزومي اوردا آراز ايله ميسن
بو گوزلليك كي جهاندا سنه وئرميش تانري
هر قدر ناز ائله سن ايله، كي آز ايله ميسن
من بو سوز يله آتدين، آرالاندين بيليرم
آراني بير پارا نامرديله ساز ايله ميسن
دستماز ايله ديگين چشمه،مسيحا قاني دير
بيلميرم هانسي كليساده نماز ايله ميسن؟
من«عشيران» اوخوسام، پنجه«عراق» اوسته گزه ر
گوزليم، «ترك» اولالي، ترك «حجاز» ايله ميسن
تازا شاعر، بوده نيز هر نه باخيرسان ديبي يوخ
چوخ اوزاتسان بوغازي، اوردهگي قاز ايله ميسن
بسكه زلف و خط خالين قوپالاغين گؤتدون
زلفعلي نين باشيني آزقالا داز ايله ميسن
گل! منيم ايسته ديگيم كعبه ييخيلماز، اوجالار
باشدادا كژ گئده سن، ديبده تراز ايله ميسن
خط و خاليندن آليب مشقيمي قرآن يازارام
بو حقيقت له مني، اهل مجاز ايله ميسن
مني، دان اولدوزي، سن ياخشي تانيرسان كه سحر
افقي خلوت ائديب رازو نياز ايله ميسن
«شهريار»ين داغيليب، داغدا داشا دالدالانيب
ئوزون انصاف ايله، محمودي اياز ايله ميسن