گئتمه ترسا بالا سي
یازار : amir
+0 به يه ن
اذن
وئر توي گئجه سي من ده سنه دايه گليم
ال قاتاندا سنه مشاطه تماشايه گليم
سن بو مهتاب گئجه سي سئيره چيخان بير سرواول
اذن وئر من ده دالونجا سورونوب سايه گليم
منه ده باخدين او شهلا گوزوله من قارا گون
جرئتيم اولمادي بير كلمه تمنايه گليم
من جهنم ده ده باش ياسديقا قويسام سنيله
هئچ آييلمام كي دوروب جنت ماوايه گليم
ننه قارنيندادا سنله اكيز اولسيديم اگر
ايسته مزديم دوغولوب بيز ده بو دنيايه گليم
سن ياتيب جنتي روياده گورنده گئجه لر
من ده جنتده قوش اوللام كي او رويايه گليم
قيتليغ ايللر ياغشي تك قورويوب گوز ياشيميز
كوي عشقونده گرك بيرده مصلايه گليم
سن ده صحرايه مارال لار كيمي بير چيخ نولي كي
من ده بير صيده چيخانلار كيمي صحرايه گليم
آللاهوندان سن اگر قورخميوب اولسان ترسا
قورخورام من ده دونوب دين مسيحايه گليم
شيخ صنعان كيمي دونقوز اوتاريب ايللرجه
سني بير گورمك ايچون معبد ترسايه گليم
يوخ صنم!آنلاماديم,آنلاماديم,حاشا من
بوراخيم مسجديمي سنله كليسايه گليم
گل چيخاق طور تجلايه سن اول جلوه ي طور
من ده موسي كيمي او طوره تجلايه گليم
شيردير شهريارين شعري الينده شمشير
كيم دئيه ر من بئله بير شيرله دعوايه گليم؟
اوستاد شهريار