iraniturk

بيزي يانديرير ، يامان آيريليق                    بو داريخديران دومان آيريليق
باشا ساوورير سامان آيريليق                      آمان آيريليق ، آمان آيريليق

بير گؤزون آچار ، بير گؤزون يومار                      آرازي سرين گؤرديكده اومار
خزري درين گؤردوكجه جومار                    قان درياسينا جومان آيريليق

                             آمان آيريليق ، آمان آيريليق

آرازيم وورسون باش ، داشدان داشا                    گؤز ياشي گرك باشلاردان آشا
نئجه ياد اولسون ، قارداش - قارداشا                        نه دين قانير ، نه ايمان آيريليق

                             آمان آيريليق ، آمان آيريليق

گؤيلرين ، گونون - آيين گيزلدير                      اولدوز آخديرير ، سايين گيزله دير
اوخوني آتير ، يايين گيزلدير                         قديمي ائديب كمان آيريليق

                             آمان آيريليق ، آمان آيريليق

آيريليق گله ، بير كرم قيلا                         بير نئچه گون ده ، بيزدن آيريلا
غم ده بيز تك سووا ساوريلا                          هاني بير بئله گومان آيريليق
                             آمان آيريليق ، آمان آيريليق

دئديم آيريليق ، قيناما مني                          سني گؤرموشم ائللر دشمني
يوزمين كره ده سيناسام سني                         همان آيريليق ، همان آيريليق

                             آمان آيريليق ، آمان آيريليق

آمانسيز گؤزون يومان آيريليق                         جان جيزليغيندان اومان آيريليق
نه غملي يازار (دومان) آيريليق                          ديللره سالان دومان آيريليق

                             آمان آيريليق ، آمان آيريليق

سن اونودسان دا(سليمان) مني                          اونودمياجاق «شهريار» سني
ياز گله ر ،بولبول قاپسار چمني                        ايندي ليك سه وسون زمان آيريليق

                             آمان آيريليق ، آمان آيريليق