داها (سهراب طاهير)
یازار : amir
+0 به يه ن
دردي درد اولموشدو ائلينده منه،
آغلاديم، بير نسيل گولنده منه،
هر كس آغلاماسين اؤلنده منه،
من هئچ واخت، هئچ زامان اؤلمرم داها
آزاد قارداشيم وار، اونونلا خوشام،
من گرك ساحيلي ساحيله قوشام،
ايكي بؤلونمكدن ائله قورخموشام
چؤپو ده ايكييه بؤلمرم داها!
دنيزلر، دريالار منه دايازدير،
ان درين بير چاي وار، او دا آرازدير.
منه گؤروش وئرين، آزادليق آزدير،
گؤروشسم، آيريلماق بيلمرم داها.
عؤمرومدن قوربت لر، يادلار، قووولسون،
كئچميشيم، يييه سيز قالدي، قوي اولسون!..
آنجاق گلجه ييم منيم كي اولسون،
من اونو عؤمرومدن سيلمرم داها!
منيم سعادتيم هارداسا ايتدي،
او آسان گلميشدي، آساندا گئتدي،
منه نه ائتديسه سعادت ائتدي،
بدبخت سعادته گولمرم داها.